Zaburi 39 - MUMA MALER 2015

Ngima en gima kadho piyo

¹ Ne awacho niya, “Abiro ritora kuom gik ma atimo, mondo kik awach gimoro marach. Ok anawuo ka joricho ni machiegni.”

² Omiyo ne aling’ thi, ma ok awuoyo kata mana kuom gima ber. To kata kamano chandruokna nomedore ameda,

³ mi chunya nopong’ gi parruok, kendo kane amedo paro wachno, chunya nomedo parore moloyo. Omiyo ne ok anyal medo ling’ mak apenjo Ruoth Nyasaye niya,

⁴ “Abiro dak kuom kinde marom nadi? Koso ndalo adi ma pod odong’na? Nyisa mondo ang’e ni ngimana biro rumo karang’o!”

⁵ Mano kaka isemiya ngima machiek manadi! Hika tin e nyimi miwuoro! Adier, dhano en mana gima nono ka yamo makudho.

⁶ Okadho mana ka tipo! Mwandu duto mochoko chalo muya maduono, to bende okia ng’ama nochamgi.

⁷ A Ruoth Nyasaye, koro ere gima anyalo geno? Genona duto aketo kuomi.

⁸ Resa kuom richona duto, kendo kik iyie joma ofuwo, makiayi, yanya.

⁹ Aling’ thi, ma kata wuoyo ok anyal wuoyo, nikech in ema ikuma.

¹⁰ Kik ichak ikuma kendo, nimar achiegni tho kuom goch migoyago.

¹¹ Ka ikwero ng’ato, to mano e kum ma ikumego kuom richone, kendo iketho gige mabeyo mana kaka biye ketho gik moko. Adier, dhano en mana gima nono ka yamo makudho.

¹² A Ruoth Nyasaye, winj lemona, kendo chik iti ni ywakna, kik iling’ kineno ka pi wang’a chwer. An wendoni e pinyni mana kuom kinde matin kende, kaka kwerewa bende nobedo wendi.

¹³ Yie iweya mondo chunya oduogi, ka pok aa, mi adhi chuth!