Zaburi 37 - MUMA MALER 2015

Joricho onge gi kue

¹ Kik chunyi chandre nikech timbe joma richo, bende kik iwe nyiego maki gi joma timo richo.

² Piyopiyo nono gibiro lal ka lum motwo. Ee, gibiro tho ka oboke ma ner.

³ Gen kuom Ruoth Nyasaye mondo itim maber, eka idag e piny gi kue.

⁴ Onego iyud mor mana kuom Ruoth Nyasaye, eka omiyi gik ma idwaro.

⁵ Chiwrine, kendo gen kuome, to obiro konyi.

⁶ Enomi nenre maler ni in ng’ama kare, kendo enomi timni makare rieny kaka chieng’ rieny odiechieng’ tir.

⁷ Bed gi kue e nyim Ruoth Nyasaye, kendo hori mos kirite. Kik iwe chunyi chandre nikech ji madhi maber, kata nikech joma timo timbe maricho.

⁸ Kik ibed gi mirima, kendo kik iwe iyi wang’, nikech mano nyalo teri e richo.

⁹ Joma ogeno kuom Ruoth Nyasaye biro dak gi kue e piny, to joma richo ibiro riemb oko.

¹⁰ Bang’ kinde matin, joma timbegi richo biro lal nono, kendo kata obedo ni imanyogi matek, to ok niyudgi.

¹¹ To joma muol ema nobed weg piny, kendo giniyud mor maduong’ ka gidak gi kue.

¹² Ng’at ma timbene richo chano timo marach ni ng’at maber, kendo igawe gi mirima.

¹³ To Ruoth Nyasaye nyiero ng’at ma timbene richo, nikech ong’eyo ni obiro rumo piyopiyo.

¹⁴ Joma timbegi richo wuodho ligangla, kendo ywayo atungego mondo oneggo jochan gi joma timbegi long’o.

¹⁵ To kata kamano gin ema liganglagi biro chwowogi, kendo atungegi biro tur.

¹⁶ Gik matin ma ng’at maber nigo, oloyo mwandu mathoth ma joma timbegi richo nigo,

¹⁷ nimar Ruoth Nyasaye notiek joma timbegi richo, to norit joma beyo.

¹⁸ Ruoth Nyasaye rito joma oluore, kendo piny nobed margi nyaka chieng’.

¹⁹ Ok ginithagre ka piny rach, kendo ginibed gi cham moromogi e ndalo kech.

²⁰ Joma timbegi richo to notho. Adier, wasik Ruoth Nyasaye nolal nono ka maua makethore piyo. Ee, gibiro dum mi gilal ka iro.

²¹ Ng’at ma timbene richo holo, to ok chul gima oholo. Ng’at maber to ng’won, kendo konyo ji.

²² Joma Ruoth Nyasaye oguedho nodag e piny gi kue, to jogo ma okuong’o notiek pep.

²³ Ruoth Nyasaye telo ni dhano e yo monego oluw. Omako dhano matek, kendo orango kama oluwo.

²⁴ Kata ka opodho, to ok nokungre gi ume, nimar Ruoth Nyasaye omako lwete.

²⁵ Chakre tinna nyaka koro abedo jaduong’, pok anenoe ng’at makare ma Ruoth Nyasaye ojwang’o, kata ma nyithinde kuecho.

²⁶ Kinde duto ong’won kendo oholo ji mabup. Mano ema omiyo nyithinde oguedhi.

²⁷ We timo richo, mondo ibed ng’ama ber, eka inidag e piny nyaka chieng’,

²⁸ nikech Ruoth Nyasaye ohero gima kare, kendo ok ojwang’ joma oluore, to oritogi pile. Nyikwa joricho to notiek chuth.

²⁹ Ng’at makare nodag e piny gi kue nyaka chieng’.

³⁰ Ng’at makare wuoyo gi rieko, kendo oloso mana kuom gik ma adier.

³¹ Okano chike Nyasaye e chunye, kendo oluwogi pile mak obaro.

³² Ng’at marach rango ng’at makare kodwaro yo ma donegego,

³³ to Ruoth Nyasaye ok noweye e lwet jasike, kendo ok nowe mondo bura oloye.

³⁴ Ket genoni kuom Ruoth Nyasaye, kendo rit chikene. Eka nomiyi teko mar bedo wuon piny, kendo inine kiriembo joricho oko.

³⁵ Aseneno ng’at marach ka rito piny. Ne ogar kuom ji mana ka yiend sida man Lebanon,

³⁶ to achien, kane akadho kanyo, ne ok anene. Ne amanye matek, to ne ok ayude.

³⁷ To koro, kinono ng’at maber kata ng’ama kare, to ibiro nwang’o ni ng’at man gi kue nigi nyikwaye.

³⁸ Joricho to otieko chuth, kendo nyikwagi orumo te.

³⁹ Ruoth Nyasaye reso joma kare, kendo oritogi e kinde mag chandruok.

⁴⁰ Okonyogi kendo oresogi kuom joma richo, nikech gidhi ire mondo okonygi.