Zaburi 36 - MUMA MALER 2015

Hera mosiko mar Nyasaye

¹ Richo wuoyo gi jaricho e chunye kuma tut. Jaricho ok oluoro Nyasaye kata matin.

² Owuondore kende ni en ng’at maber, omiyo oparo ni Nyasaye ok nyal fwenyo richone, mi kume.

³ Wechene richo kendo oting’o miriambo lilo. Rieko oselalne, omiyo ok onyal timo gimoro maber.

⁴ Ochano gik mamono koriere e kitanda. Timne rach, omiyo ok onyal kwero gimoro marach.

⁵ A Ruoth Nyasaye, herani mosiko kod adierani tundo nyaka e polo.

⁶ Timni makare ogurore ka gode madongo, kendo rieko mingadogo bura tut ka nam. In Ruoth Nyasaye, irito dhano gi le.

⁷ Ng’wononi mosiko ber manadi! Tipo bwombeni ema ji yudoe konyruok.

⁸ Gichamo chiemb odi mogundho mi giyieng’, kendo imiyo gimodho e aora mar berni.

⁹ In ema ngima wuok kuomi, kendo ler mari emomiyo waneno ler.

¹⁰ Yie imed herani mosiko ni joma ong’eyi, kendo tim maber ni joma kare.

¹¹ Kik iwe josunga monja, kendo kik iwe joma richo riemba.

¹² Neye kaka joricho opodho! Ogogi piny kanyo, kendo ok ginyal chung’.