Zaburi 34 - MUMA MALER 2015

Wer mipakogo ber mar Nyasaye

¹ Pile abiro goyo ni Ruoth Nyasaye erokamano, kendo ok nawe pake ndalo duto.

² Abiro dende kuom gik ma osetimo, mondo ji duto ma ithiro owinji kendo obed mamor.

³ Konyauru hulo duong’ mar Ruoth Nyasaye. Adier! Wapakuru nyinge kaachiel!

⁴ Ne aywak ni Ruoth Nyasaye, mi odwoka, kendo ne otiekona luoro duto mane omaka.

⁵ Joma ithiro geno yudo konyruok kuome, mi omiyogi mor kendo ok owe mak okonyogi.

⁶ Joma ok nyal konyore kendgi ywakne mondo okony, kendo owinjogi. Ee, okonyogi e chandruok duto ma gin-go.

⁷ Malaika mar Ruoth Nyasaye rito joma oluoro Ruoth Nyasaye kendo resogi.

⁸ Neye kendi kaka Ruoth Nyasaye ber! Ng’at ma ogeno kuome en jahawi.

⁹ Un jo-Ruoth Nyasaye duto, luoreuru, nimar joma oluore yudo gik moko duto ma gidwaro.

¹⁰ Kata mana sibuoche bende chando gik ma gicham, mi kech hew, to joma oluoro Ruoth Nyasaye ok chand gimoro amora maber.

¹¹ Un osiepena ma pod yot, biuru uwinj gima awacho. Abiro puonjou luoro Ruoth Nyasaye.

¹² Donge duher bedo mamor? Koso donge dudwar dak aming’a gi mor?

¹³ Ka kamano, to nyaka ugeng’ lewu kuom weche maricho, kendo dhou kik wach miganga.

¹⁴ Weuru timo richo, to timuru mana gik mabeyo. Dwaruru kue e kinde duto, mi uluw.

¹⁵ Ruoth Nyasaye rango joma kare gi ng’wono, kendo pile oyie winjo ywakgi.

¹⁶ To omon gi joma timo richo, kendo omiyo nyinggi rumo e piny.

¹⁷ Ji morito chik Ruoth Nyasaye ywakne, kendo owinjogi. Ogologi e chandruok duto ma gi-go.

¹⁸ Ruoth Nyasaye chiegni gi joma chunygi onyosore, kendo owaro joma chunygi osea chuth.

¹⁹ Ng’at maber yudo chandruok mang’eny, to Ruoth Nyasaye rese kuom mago duto,

²⁰ Kendo orite maber chutho, ma kata mana chok dende achiel ok tur.

²¹ Richo biro nego joma timo richo, kendo jogo ma mon gi joma kare biro yudo kum.

²² Ruoth Nyasaye waro jotichne, kendo ji duto mogeno kuome notony.