Zaburi 32 - MUMA MALER 2015

Hulo richo gi yudo werruok

¹ Mano kaka ng’at ma Nyasaye oweyone kethone, kendo orucho richone en jahawi!

² Adier, ng’at ma Ruoth Nyasaye koro ok kwan ka jaricho kendo ma onge miganga e chunye en jahawi.

³ E kinde mane pod aling’ mak ahulo richona chokena ne muodore nikech ne aywak odiechieng’ duto.

⁴ A Ruoth Nyasaye, ne ikuma odiechieng’ gotieno, mi tekra ne oduono chuth, mana ka pi ma duno e ndalo oro.

⁵ Bang’e ne ahulo richona e nyimi, kendo ne ok apando timbena mamono. Ne aneno ni ber mondo ahulni richona, mi iweyonagi duto.

⁶ Mano omiyo ji duto moluori onego olami ka gin e chandruok. Kamano, ka ohula maduong’ mwomore ka biro, to ok noywergi.

⁷ In e kuma apondoe, omiyo ibiro resa e masira. Apaki gi dwol maduong’ nikech iwara kendo irita.

⁸ Ruoth Nyasaye wacho niya, “Abiro nyisi yo ma onego iluw. Adier, abiro puonji kendo abiro ng’adoni rieko.

⁹ Kik ibed momemore ka faras kata ka nyumbu, ma nyaka tue dhoge gi rateke kod tol, eka chikego e yo.”

¹⁰ Joricho biro yudo thagruok, to hera mosiko mar Ruoth Nyasaye rito joma ogeno kuome.

¹¹ Un ji duto morito chike Nyasaye, beduru mamor ahinya nikech gima Ruoth Nyasaye osetimo. Koguru gi ilo, un ji duto muluore.