Zaburi 31 - MUMA MALER 2015

Lemo mar geno kuom Nyasaye

¹ A Ruoth Nyasaye abiro iri mondo irita, ka akwayi ni mondo kik wasigu loya, mi wiya kuodi. Resa, nikech in Nyasaye makare.

² Winja mondo iresa sani. Bed kar konyruokna,

³ nikech in e ohingana kendo e tekona. Nyisa yo, kendo telna kaka isesingori.

⁴ Rita maber mondo obadho mosechikna kik maka. In e kar konyruokna.

⁵ A Nyasaye, aketora e lweti mondo iwara, nimar in Nyasaye ma jaadiera.

⁶ Imon gi joma lamo nyiseche ma nono, an to ageno kuomi.

⁷ Abiro bedo mamor ahinya nikech herani mosiko. In ineno thagruok ma an go. Adier, ing’eyo chandruokna.

⁸ Ok iseweyo mondo wasika omaka, to isegola oko, kimiya thuolo.

⁹ A Ruoth Nyasaye, bedna mang’won, nikech an e thagruok. Wang’a oowore nikech aseywak ahinya, kendo aol mi abarora ndasi.

¹⁰ Kuyo osemiyo ngimana odoko machwok, kendo ywak osemiyo hika ong’adore machiek. Thagruok duto ma an go osemiyo adoko makeng’keng’, kata mana chokena bende mich amicha.

¹¹ Wasika duto jara, kendo kata jogweng’wa tugo mana koda. Abwogo ji duto ma ong’eya. Ka ginena e wang’yo, to giringa aringa.

¹² Ji duto wigi osewil koda, mana ka gima asetho, kendo achalo mana ka yugi ma osewit oko.

¹³ Awinjo ka wasika kuotho, ka bwoga kuonde duto. Gihondho wach kaachiel mondo ginega.

¹⁴ To an aketo genona kuomi, A Ruoth Nyasaye, kendo awacho ni, “In e Nyasacha.”

¹⁵ Pile in ema irita. Resa e lwet wasika, kendo e lwet joma dwaro sanda.

¹⁶ An jatichni, akwayo ni mondo iranga gi ng’wono. Resa nikech herani mosiko.

¹⁷ A Ruoth Nyasaye, aywakni, omiyo kik iwe loya, mi wiya kuodi. To joricho ema onego lo, kendo gin ema onego gilwar e piny joma otho, mi giling’ thi.

¹⁸ Mak dho jomriambo ma josunga, ma wuoyo ka jaro joma kare.

¹⁹ Mano kaka gik mikano ni joma oluori beyo! Rit miritogo joma ogeno kuomi bende lich miwuoro.

²⁰ Ipandogi kama intie mondo kik ji hinygi. Ee, ipandogi kama ogeng’ore, mondo kik wasikgi yanygi.

²¹ Pakuru Ruoth Nyasaye! Mano kaka nonyisa herane miwuoro, kane wasika olwora momonja.

²² Luoro ne omaka, kaparo ni isewita oko, to kata kamano kane aluongi mondo ikonya, to niwinjo ywakna.

²³ Heruru Ruoth Nyasaye, un joge duto maler. Orito jogo moyie kuome. Joma sungore to okumo malit.

²⁴ Un duto mugeno kuom Ruoth Nyasaye, beduru gi chir kendo gi jing’o!