Zaburi 28 - MUMA MALER 2015

Lemo mar konyruok

¹ Aluongi, A Ruoth Nyasaye ma lwandana! Winj ywakna, nikech ka ok idwoka, to dabed e kanyakla mar joma dhi e piny joma otho.

² Winja ka aywakni mondo ikonya, kating’o bedena malo, kochomo Hekalu mari maler.

³ Kik ikuma kaachiel gi joricho. Gin joma timo timbe mamono, kendo ma wechegi mit, to chunygi opong’ gi sigu.

⁴ Kumgi kuom richo ma gisetimo. Ee, kumgi kuom wechegi maricho duto, kendo timnigi mana kaka owinjore kodgi.

⁵ Ok gidew gik ma Ruoth Nyasaye osetimo, kata gik ma osechueyo. Omiyo obiro kumogi, mi otiekgi chuth.

⁶ Pakuru Ruoth Nyasaye, nimar osewinjo ka aywak ni mondo okonya.

⁷ Ruoth Nyasaye e tekra, kendo e okumbana. Asegeno kuome, mi okonya, omiyo amor kendo awerone wende pak.

⁸ Ruoth Nyasaye e teko joge, orito ruoth ma oyiero kendo orese.

⁹ A Ruoth Nyasaye, war jogi ma mwanduni iwuon kendo iguedhgi. Bed jakwadhgi, kendo iritgi nyaka chieng’.