Zaburi 26 - MUMA MALER 2015

Lemo mar ng’at makare

¹ A Ruoth Nyasaye, nyis ni aonge gi ketho, nikech atimo mana gik makare, kendo ageno kuomi chuth.

² A Ruoth Nyasaye, nona, kendo miya tem, bende rang paro manie chunya.

³ Herani mosiko ema nyisa gima owinjore atim, kendo pile adierani ema telona.

⁴ Ok awuoth e oganda joma nono, bende ok an osiep joma wuondore ni beyo.

⁵ Amon gi joma timo timbe mahundu, kendo abet mabor gi joma joricho.

⁶ A Ruoth Nyasaye, alwoko lweta kanyisogo ni aonge gi ketho, kendo alworo kendoni mar misango,

⁷ ka awero wend erokamano, kendo ka ahulo gik malich ma itimo. A Ruoth Nyasaye, ahero ot ma idakie ma en kama duong’ mari maler nitie.

⁹ Kik itieka kaachiel gi joricho, kata gi joma chuero remo,

¹⁰ nimar pile gitimo richo, kendo giikore mar chiwo asoya.

¹¹ An to atimo mana gik makare, omiyo yie ikecha kendo iwara.

¹² Asenyono kama otegno, omiyo apako Ruoth Nyasaye e chokruok madongo.