Zaburi 25 - MUMA MALER 2015

Lemo mikwayogo Nyasaye mondo oriti kendo otelni

¹ A Ruoth Nyasaye, alami.

² In e Nyasacha ma ageno kuome. Resa mondo kik wiya kuodi koloya, kendo kik iwe wasika gona siboi.

³ Ji ma ogeno kuomi ok yud wichkuot, to joma piem kodi kayiem ema wigi kuot.

⁴ A Ruoth Nyasaye, puonja yoreni, mondo ang’egi.

⁵ Puonja kendo keta e yoreni makare, nikech in e Jawarna. Ageno kuomi pile odiechieng’ duto.

⁶ A Ruoth Nyasaye, par ng’wononi kod herani mosiko, ma isenyiso nyaka nene.

⁷ Kik ipar kethona kod richo mane atimo ka pod atin, to parae kuom ng’wononi kod herani mosiko.

⁸ Ruoth Nyasaye en ng’ama kare kendo maber. Opuonjo joricho yore monego giluw.

⁹ Bende otelo ni joma muol mondo otim gik makare, kopuonjogi timo gik ma odwaro.

¹⁰ Ji duto ma orito chikene gi singruokne biro neno ni otelonigi gi hera kod adiera.

¹¹ A Ruoth Nyasaye, rit singruokni, mondo iwena richona, nikech ging’eny ahinya.

¹² Ruoth Nyasaye biro nyiso joma rito chikene yo ma onego giluw.

¹³ Pile ginidhi nyime maber, kendo nyikwagi nobed weg pinyni,

¹⁴ Ruoth Nyasaye en osiep joma oluore, kendo opuonjogi tiend singruokne.

¹⁵ E kinde duto ang’iyo mana Ruoth Nyasaye mondo okonya, nimar ogola e obadho momako tienda.

¹⁶ A Ruoth Nyasaye, bi mondo itimna ng’wono, nikech adong’ kenda, kendo an e thagruok.

¹⁷ Yie igol kuyo mopong’o chunya, kendo resa e chandruokna duto.

¹⁸ Par thagruok kod lit ma an go, kendo iwenae richona duto.

¹⁹ Rangie wasikagi duto kaka ng’eny, kendo neye kaka gimon koda marach!

²⁰ Rita kendo ikonya, mondo kik iwe loya, mi wiya kuodi, nikech aringo iri mondo irita.

²¹ Onego berna gi adierana keta kama ber, nimar ageno kuomi.

²² A Nyasaye, res jogi Israel kuom chandruokgi duto.