Zaburi 21 - MUMA MALER 2015

Wer mipakogo Nyasaye kuom loyo wasigu

¹ A Ruoth Nyasaye, ruodhwa mor nikech teko mane imiye. Oil ahinya nikech ne imiyo oloyo lweny.

² Isemiye gima ne chunye dwaro, kendo isedwoko kwayone.

³ Ne irwake gi gweth maduong’, kendo ne isidhone osimbo mar dhahabu maler.

⁴ Ne okwayo mondo imiye ngima, mi nimiye. Ee, noyudo ngima malach kendo mosiko.

⁵ Isekonye, kendo isemiye duong’ gi teko gi pak.

⁶ Isegwedhe gi gweth mochwere, kendo obedo gi mor maduong’, nikech in kode.

⁷ Ruodhwa ogeno Ruoth Nyasaye, kendo obiro bedo ruoth ma ok yiengni, nikech hera mosiko mar Ng’ama Duong’ Moloyo.

⁸ Ruodhwa biro mako wasike duto. Obiro mako ji duto mamon kode.

⁹ Ka othinyore, to obiro tiekogi mana ka mach mang’ang’ni. A Ruoth Nyasaye, in bende ibiro tiekogi gi mirimbi, mi mach nowang’gi pep.

¹⁰ Ruodhwa to biro nego nyithindgi duto, koda ka nyikwagi bende obiro tieko.

¹¹ Kata obedo ni giparo yore maricho ma digitiekego, to obiro tamogi.

¹² Obiro chielogi gi aserni, mi gimuoch gi ng’uech.

¹³ A Ruoth Nyasaye, bi gi tekoni! Wabiro wer kwapako duong’ni maler.