Zaburi 19 - MUMA MALER 2015

Ber mar gik ma Nyasaye ochueyo gi ber mar chikne

¹ Mano kaka polo nyiso duong mar Nyasaye! Onyiso ratiro gik ma Nyasaye osechueyo.

² Odiechieng’ kodiechieng’ hulo ni wadgi duong’ nogono, kendo otieno ka otieno bende timo kamano.

³ Ok gilosi kendo onge dhok ma gikonyorego, kata mana dwol moro bende ok winji,

⁴ to kata kamano gima ginyiso, iwinjo e pinje duto. Wachgi tundo e tung’ piny gi tung’ piny. Nyasaye oseyaro ni wang’ chieng’ hema e kor polo.

⁵ Pile wang’chieng’ thinyore oko mana ka wuon kisera ma wuok e ode ka mor, kendo oil mana ka jang’wech maratego madwaro ringo.

⁶ Ochako ng’wech e tung’ polo konchiel, kendo olworore nyaka komachielo. Lietne chopo kuom gik moko duto te.

⁷ Chik Nyasaye long’o kendo chiwo ngima manyien. Weche mag Nyasaye gin weche mogen. Gichiwo rieko ni joma ongego.

⁸ Chike mag Ruoth Nyasaye ni kare kendo miyo chuny mor. Adier, chike Nyasaye beyo kendo yawo wang’.

⁹ Luoro Ruoth Nyasaye en gima ber mosiko nyaka chieng’. Buche Ruoth Nyasaye ni kare, ma onge moro mobam.

¹⁰ Gibeyo moloyo dhahabu, kata mana dhahabu malerie moloyo. Bende gimit moloyo mor kich moton kaa e pedni.

¹¹ A Ruoth Nyasaye, bucheni miya rieko, an jatichni, kendo ng’ama ritogi yudo pok mabup.

¹² To ere ng’ama nyalo ng’eyo kethone owuon? Wena kethona mopondo.

¹³ Kik iwe richo mag wichteko loya. Eka anabed maler, ka aonge gi richo moro maduong’.

¹⁴ Wechena gi parona mondo obedni malong’o. In e jaritna kendo jawarna!