Zaburi 16 - MUMA MALER 2015

Mwandu ma ng’ama kare chamo

¹ A Nyasaye, rita, nikech in e jakonyna.

² Asewacho ni Ruoth Nyasacha niya, “In e Ruodha, kendo gik mabeyo duto ma an-go oa mana kuomi.”

³ Joma ogeno kuom Ruoth Nyasaye gin joma beyo, kendo amor kodgi gi chunya duto.

⁴ Joma ringo dhi kuom nyiseche mamoko kelo chandruok mang’eny kuomgi giwegi. Ok anatim kodgi misengni mag remo ma giolo piny, kendo ok nalam nyisechegigo.

⁵ A Ruoth Nyasaye, in kendi ema an kodi, kendo imiya gik moko duto ma adwaro. Ngimana duto nie lweti.

⁶ Mwandu ma aseyudo lich miwuoro, kendo oroma maber.

⁷ Apaki in Ruoth Nyasaye ma ng’adona rieko. Adier, chunya puonja gotieno.

⁸ Pile apari, in Ruoth Nyasaye man koda. Ibet e bada korachwich, omiyo onge gima nyalo yienga.

⁹ Kuom mano chunya opong’ gi mor kod ilo, kendo ringra bende nigi kue,

¹⁰ nikech ok niwe adhi e piny joma otho. Ee, ok nijwang’ jatichni mihero mondo odhi e bur,

¹¹ Inyisa yo matera e ngima. Kama intie ema ilo maduong’ yudoree, kendo e lweti ma korachwich ema gik mamiyo chuny mor nitie mosiko.