Zaburi 141 - MUMA MALER 2015

Lemo mar odhiambo

¹ A Ruoth Nyasaye, akwayi ni mondo ikonya piyopiyo! Yie iwinja ka aluongi.

² Lemona mondo obedni ka ubani miwang’o e nyimi, kendo bedena mating’o malo mondo obedni ka misango mar odhiambo.

³ A Ruoth Nyasaye, ket jarit e dhoga, mondo orita, kik awach gima ok owinjore.

⁴ Rita mondo kata mana gombo timo richo kik agombi, kata kik akony joricho timo timbegi mamono. Bende kik iwe abed kodgi kaachiel e sewni maggi.

⁵ Ng’at makare nyalo kuma, kendo kwera gi ng’wono, to ok nawe jaricho wir wiya gi mo, nikech pile alemo mondo timbene maricho okethre.

⁶ Chieng’ ma iwito ruodhigi piny ewi lwendni, to ji noyie ni wechena gin adier.

⁷ Chokegi noke e dho bur liel, mana ka agulu motore, mi ong’inyore matindo tindo.

⁸ To an, A Ruoth Nyasaye, wang’a osiko kuomi, kadwaro mondo irita. Adier, kik iwe atho!

⁹ Rita kuom obadho ma gisechikona. Ee, resa kuom obeto mag joricho.

¹⁰ Mad joma timbegi mono mok e obathgi giwegi, ka an to akadho mak gimoro ohinya.