Zaburi 139 - MUMA MALER 2015

Nyasaye Manyalo Gik Moko Duto

¹ A Ruoth Nyasaye, isenona ming’eya chutho!

² Ing’eyo gik moko duto ma atimo. Adier, ing’eyo parona duto gi kuma bor!

³ Inena kuonde duto ma adhiyoe, kod kuonde duto ma ayueyoe. Chutho, ing’eyo yorena duto!

⁴ Kata ka pok awuoyo, to ing’eyo gima adwaro wacho.

⁵ Ilwora, mi iketa diere koni gi koni. Adier, irita gi tekoni maduong’.

⁶ Ng’ech ming’eyago lich miwuoro! Chutho, otut ma ok anyal winjo tiende.

⁷ Ka da bed ni adwaro ringo Roho mari, to ere kuma dapondie?

⁸ Ka aringo adhi e polo, to in kuno. Kata ka ayikora piny, kuma joma otho nitie, to kuno bende intie!

⁹ Ka da bed ni an gi buomba ma anyalo huyogo nyaka ugue, kata ka adak e tung’ nam man yo imbo,

¹⁰ to kuno bende dibedie mondo itelna kendo ikonya.

¹¹ Anyalo wacho ni mudho mondo oima, kata anyalo nyiso ler marieny kuoma mondo olokre mudho,

¹² to kata mana mudho ok nyal moni neno, kendo otieno lerni mana ka odiechieng’. Chutho, mudho gi ler chalreni!

¹³ In ema ne ichueyo denda duto. Adier, in ema ne iriwo fuondena kaachiel ei mama.

¹⁴ Apaki, nikech in ema iwinjori gi luor. Gik moko duto mitimo lich, kendo odhiero ji. Ang’eyogi gi chunya duto.

¹⁵ Ne ineno ka chokena chakore, kendo ka iriwogi maber ei mama, e kinde mane adongo kuno ling’ling’.

¹⁶ Ne inena kapod ichueya ei ich, kendo ndalo mane oketna bende ne isendiko e kitapi ka pok ochak kwan-gi.

¹⁷ A Nyasaye, mano kaka paroni odhiera ng’eyo! Yaye, mano kaka ging’eny!

¹⁸ Ka dabed ni anyalo kwanogi, to da anwang’o ni ging’eny moloyo kuoyo. To ka achiew, to ayudo ni pod an kodi!

¹⁹ A Nyasaye, mano kaka agombo ni mondo ineg joricho! Bende mano kaka agombo ni mondo jonek obed mabor koda!

²⁰ Giwacho weche maricho kuomi. Adier, giketho nyingi gi weche mamono.

²¹ A Ruoth Nyasaye, mano kaka amon gi joma mon kodi, kendo mano kaka asin gi jogo mapiem kodi.

²² Mon ma amon go kodgi lich, kendo akwanogi ka wasika.

²³ Nona, A Nyasaye, mondo ing’e chunya. Ee, tema mondo ing’e parona.

²⁴ Rang ane ka nitie miganga moro e chunya, kendo telna e yo mosiko nyaka chieng’.