Zaburi 138 - MUMA MALER 2015

Lemo mar goyo ni Nyasaye erokamano kuom ng’wonone

¹ A Ruoth Nyasaye, agoyoni erokamano gi chunya duto. Apaki gi wer e nyim nyiseche.

² Akulora piny kachomo Hekalu mari maler, kapako nyingi nikech herani mosiko kod adierani, kendo nikech iseyaro singruokni, modoko malach ka polo.

³ Kane aluongi, to ne idwoka, kendo ne itega gi tekoni.

⁴ A Ruoth Nyasaye, ruodhi duto mag piny biro paki, nikech gisewinjo wecheni.

⁵ Gibiro wero gik ma isetimo, kendo gibiro pako duong’ni maler.

⁶ Kata obedo ni in malo chutho, A Ruoth Nyasaye, to pod ikecho joma ni e piny. Josunga bende ok nyal pondoni!

⁷ Kata e kinde ma masiche oketa diere, to irita maber. Ikwedo wasika ma jokwinyo, kendo iresa gi teko mar badi ma kor achwich.

⁸ Ibiro timo gik moko duto ma isesingorina. A Ruoth Nyasaye, herani mosiko ochwere, omiyo kik iwe tich ma isechako, mak itieko.