Zaburi 119 - MUMA MALER 2015

Ber mar Chik Nyasaye

¹ Joma onge ketho, kendo matimo kaka chik Ruoth Nyasaye dwaro, gin johawi!

² Joma oluwo chikene kendo moluore gi chunygi duto, bende gin johawi.

³ Adier, joma kamago ok tim gik maricho, to giwuotho mana e yore Nyasaye.

⁴ Isemiyowa chikeni, kendo iwachonwa ni onego waluwgi gi adiera.

⁵ Mano kaka ageno ni abiro luwo chikeni maber.

⁶ Ka arito chikeni duto adimba, eka wiya ok nokuodi.

⁷ Bende ka asepuonjora bucheni ming’ado kare, to anapaki gi chuny malong’o.

⁸ Anarit chikeni gi adiera, omiyo yie kik ijwang’a ngang’.

Mako Chik Nyasaye

⁹ Ere kaka ng’at ma pod tin dirit ngimane bed maler? Dorite mana ka omako wachni, A Ruoth Nyasaye.

¹⁰ Atemo tiyoni gi chunya duto, omiyo rita mondo kik awe luwo chikeni.

¹¹ Akano wachni e chunya, mondo kik akethi e nyimi.

¹² A Ruoth Nyasaye, apaki. Yie ipuonja chikeni.

¹³ Chike duto ma isegolo, anaol achiel ka achiel.

¹⁴ Chikeni miya mor, moloyo mor ma mwandu mang’eny miya.

¹⁵ Aparo chikeni matut, kendo arango yore midwaro mondo aluw.

¹⁶ Amor ahinya gi chikeni, kendo wiya ok nowil gi wachni.

Mor miyudo kuom Chik Nyasaye

¹⁷ Bedna mang’won an jatichni, mondo adag aming’a kendo amak wachni.

¹⁸ Yaw wang’a mondo ane weche miwuoro manie chikni.

¹⁹ Anie pinyka mana kuom kinde matin, omiyo kik ipandna chikeni.

²⁰ Siso oloya seche duto, kadwaro ng’eyo buche ming’ado.

²¹ Ikwero josunga. Ee, joma obaro moweyo chikeni okuong’!

²² Gol kuoma ayany kod ajara ma ji chayago, nikech aserito chikeni.

²³ Kata obedo ni jotelo chokore kachano timona marach, to an, jatichni, pod apuonjora apuonja chikeni.

²⁴ Chikeni miya mor, kendo gin ema gikelona rieko.

Keto chuny kuom rito Chik Nyasaye.

²⁵ Ariera piny e buru koloya, omiyo miya ngima kaka nisingori.

²⁶ Ne ahulo gik moko duto ma asetimo, mi idwoka, koro puonja chikeni.

²⁷ Nyisa kaka onego arit chikeni, eka apar chikeni miwuoro.

²⁸ Kuyo omona yueyo, omiyo meda teko kaka ne isingori.

²⁹ Konya kik aluw yore mag miriambo, kendo ng’wonna mondo amak chikni.

³⁰ Aseyiero yor adiera, kendo bucheni ming’ado aseketo e nyima.

³¹ Asemako chikeni matek, yaye Ruoth Nyasaye, kik iyie wiya kuodi.

³² Abiro rito chikeni gi chunya duto, nikech ibiro meda rieko.

Lemo mar ng’eyo Chik Nyasaye

³³ A Ruoth Nyasaye, puonja tiend chikeni mondo aritgi kinde duto.

³⁴ Lerna tiend chikni mondo ariti. Ee, anarite gi chunya duto.

³⁵ Telna mondo awuoth kaka chikeni dwaro, nikech gin ema gimiya mor.

³⁶ Miya chuny mohero rito chikeni, kar bedo gi mwandu.

³⁷ Rita mondo kik adew gik manono, to bedna mang’won kaka ne isingori.

³⁸ Rit singruok mane isingorinago, an jatichni. En singruok ma itimo ni ji duto moluori.

³⁹ Geng’na ayany ma aluoro, nikech buche ming’ado beyo.

⁴⁰ Mano kaka adwaro ni mondo arit chikeni! Ng’wonna, nikech in ng’at makare.

Geno kuom Chik Nyasaye

⁴¹ A Ruoth Nyasaye, nyisa hera maduong’ miherago, kendo resa kaka isesingori.

⁴² Eka anyalo dwoko joma yanya, nikech ageno kuom wachni.

⁴³ Miya teko mondo ahul wachni maradiera kinde duto, nikech genona ni kuom buche ming’ado.

⁴⁴ Kamano anarit chikni ndalo duto nyaka chieng’.

⁴⁵ Anadag gi thuolo, nikech asetemo rito chikeni,

⁴⁶ bende anahul ni ruodhi chikeni, ka aonge gi wich kuot.

⁴⁷ Ayudo mor kuom rito chikeni, nikech aherogi.

⁴⁸ Aluoro chikeni kendo aherogi, omiyo anapargi matut.

Bedo gi adiera kuom Chik Nyasaye

⁴⁹ Par gima ne isingori ni nitimna an jatichni, nikech osemiyo abedo gi geno.

⁵⁰ Kata kane anie chandruok, to singruok mari, mane omiya ngima, ne ohoyo chunya.

⁵¹ Josunga osebutona ahinya, to pok aleng’ora maweyo chikni.

⁵² Aparo chike mane imiya chon, kendo gihoyo chunya, yaye Ruoth Nyasaye

⁵³ To ka aneno joricho ka ketho chikni, to mirima pong’o chunya.

⁵⁴ Achuogo wende kuom chikeni, kamoro amora ma adakie.

⁵⁵ Apari gotieno, A Ruoth Nyasaye, kendo arito chikni,

⁵⁶ amor nikech arito chikeni.

Chiwruok ni Chik Nyasaye

⁵⁷ A Ruoth Nyasaye, in e gimoro amora ma adwaro. Asingora ni abiro rito chikeni.

⁵⁸ Akwayi gi chunya duto ni mondo ing’wonna kaka isesingori.

⁵⁹ Aserango timbena, mi asingora ni nyaka aluw chikeni.

⁶⁰ Areto mak ariwra mondo arit chikeni.

⁶¹ Ogend joricho oketa diere, to kata kamano wiya ok nyal wil gi chikni.

⁶² Achiew dier otieno mondo apaki, nikech buche ming’ado ni kare.

⁶³ An e kanyakla mar ji duto ma tiyoni, kendo ma orito chikeni.

⁶⁴ A Ruoth Nyasaye, herani mosiko opong’o piny. Yie ipuonja chikeni.

Ndhadhu mar Chik Nyasaye

⁶⁵ Iserito singruokni, A Ruoth Nyasaye mi itimona maber, an jatichni.

⁶⁶ Miya rieko mar ng’ado weche kare. Ng’eyo bende mondo imiya, nikech ageno mana kuom chikeni.

⁶⁷ Kane pok ikuma, to ne abayo maweyo yoreni, to koro amako wachni.

⁶⁸ Iber manade! Mano kaka ikecho ji! Yie ipuonja chikeni.

⁶⁹ Josunga ketho nyinga gi weche mag miriambo, to kata kamano, arito chikeni gi chunya duto.

⁷⁰ Jogo onge gi rieko, an to chikeni ema miya mor.

⁷¹ Kum misekumago berna, nikech okonya mondo apuonjra chikni.

⁷² Chik mawuok e dhogi berna. Moloyo fedha gi dhahabu mogundho.

Adiera mar Chik Nyasaye

⁷³ A Ruoth Nyasaye, in ema ne ichueya, kendo irita maber.

⁷⁴ Ji duto moluori nobed mamor konena, nikech ageno kuom wachni.

⁷⁵ A Ruoth Nyasaye, ang’eyo ni buche ma ing’ado ni kare, kendo ne ikuma nikech in jaadiera.

⁷⁶ Herani mosiko mondo oho chunya, kaka ne isesingorina, an jatichni.

⁷⁷ Kecha mondo abed mangima, nikech ahero chikni

⁷⁸ Onego wi josunga kuodi, nikech gidonjona kayiem nono. An to chikeni ema abiro paro matut.

⁷⁹ Ji duto ma oluori kendo mohero chikeni mondo obi ira.

⁸⁰ Konya amak chikeni gi chunya duto mondo kik ayud wichkuot.

Lemo mar resruok

⁸¹ Siso oloyo chunya, A Ruoth Nyasaye, karito mondo iresa. To kata kamano wachni ema pod ageno.

⁸² Wang’a koro oowore kuom rango gima ne isingori, to pod apenjo niya, “Inikonya karang’o?”

⁸³ An ng’at manono, mana ka puga mobarore, to pok wiya owil gi chikeni.

⁸⁴ Onego arit nyaka karang’o ka pok ikumo joma sandago?

⁸⁵ Josunga ma ok ong’eyo chikeni, osekunyona bugni mondo anyumrae.

⁸⁶ Konya, nikech ji sanda gi weche mag miriambo, to chikeni duto gin adier.

⁸⁷ Gisechiegni nega, to ok asejwang’o chikeni.

⁸⁸ Ng’wonna, nikech herani mosiko, mondo arit chikeni.

Yie kuom Chik Nyasaye

⁸⁹ A Ruoth Nyasacha, wachni ogurore e polo kendo nosik nyaka chieng’.

⁹⁰ Adiera mari osiko kuom tienge duto, kogurore motegno mana kaka piny osiko kama iseketee.

⁹¹ Gik moko duto pod osiko nyaka chil kawuono mana nikech wachni, nimar giduto gitiyoni.

⁹² Ka dine ni ok chikni e kama morna wuokie, to dikoro kum mikumago osenega.

⁹³ Ok anawe chikeni ngang’, nikech gin ema omiyo isemiyo abedo mangima.

⁹⁴ A Ruoth Nyasaye, an ng’ati, yie ikonya nimar asetemo rito chikeni.

⁹⁵ Joricho kiya mondo onega, to chikeni ema abiro paro matut.

⁹⁶ Ang’eyo ni kata mana gik mabeyo duto nigi gikogi, mak mana chikni kende ema onge gi gikone.

Hero Chik Nyasaye

⁹⁷ Mano kaka ahero chikni! Apare odiechieng’ duto.

⁹⁸ An gi chikni seche duto, omiyo abedo mariek moloyo wasika.

⁹⁹ An gi paro matut moloyo jopuonjna, to nikech chikeni ema aparo.

¹⁰⁰ Riekona bende lach moloyo kata jopuonjna, to nikech arito chikeni.

¹⁰¹ Asetang’ ni timbe maricho duto, nikech adwaro rito chikeni.

¹⁰² Ok aseleng’ora, maweyo chikeni, nikech in iwuon ema isebedo jopuonjna.

¹⁰³ Mano kaka chikeni mit. Adier, gimit moloyo mor kich!

¹⁰⁴ Chikeni ema miya rieko, omiyo achayo timbe duto maricho.

Ler maa kuom Chik Nyasaye

¹⁰⁵ Wachni e taya ma nyisa kama anyono, kendo e ler ma menyona yo.

¹⁰⁶ Akuong’ora ni anarit chikeni makare, mana kaka ne asingora.

¹⁰⁷ A Ruoth Nyasaye, athagora malit ahinya, omiyo miya abed mangima kaka isesingori.

¹⁰⁸ Yie gi lemona mar erokamano, kendo puonja chikeni, yaye Ruoth Nyasaye.

¹⁰⁹ Pile ngimana nie masira, to kata kamano pok wiya owil gi chikni.

¹¹⁰ Joricho chikona obadho, an to pok aleng’ora maweyo chikeni.

¹¹¹ Chikeni gin mwanduna mosiko, kendo gin ema gimiyo chunya mor.

¹¹² Aseketo chunya mondo arit chikeni nyaka thona.

Kue mawuok kuom Chik Nyasaye

¹¹³ Amon gi joma nigi chuny ariyo, to ahero mana chikni.

¹¹⁴ In e okumbana kendo e kara ma apondoe. Singruok mari ema ageno.

¹¹⁵ Auru kuoma, un joricho, mondo arit chike Nyasacha.

¹¹⁶ Miya teko kaka ne isingori, mondo abed mangima, bende kik iwe gima ageno, kadhi mak otimore.

¹¹⁷ Sira mondo abed gi kue, eka arit chikeni pile.

¹¹⁸ A Ruoth Nyasaye, idagi joma otamore rito chikeni, nikech wechegi opong’ gi miriambo kod kwinyo.

¹¹⁹ Joricho duto ikwano ka yugi. Kuom mano ahero chikeni.

¹²⁰ Luoro ma aluorigo miyo denda tetni. Buche ming’ado bende miyo kihondko maka.

Rito Chik Nyasaye

¹²¹ Asetimo gik makare kendo mabeyo, omiyo kik ijwang’a e lwet wasika.

¹²² Singrina ni inikonya, an jatichni, kendo kik iwe josunga thaga.

¹²³ Aserango warruok makare mane isingori ni ikelo, mi koro wang’a ool.

¹²⁴ Timna mana kaka herani mosiko obet, kendo puonja chikeni.

¹²⁵ An jatichni; kuom mano, miya rieko, mondo awinj tiend weche mipuonjo.

¹²⁶ A Ruoth Nyasaye, ma e sa monego itimie gimoro, nikech ji otamore winjo chikni.

¹²⁷ Ahero chikeni moloyo dhahabu malerie moloyo.

¹²⁸ Kuom mano, aluwo chikeni duto, to yore maricho duto amon-go.

Siso mar rito Chik Nyasaye

¹²⁹ Puonj magi lich miwuoro! Omiyo aritogi gi chunya duto.

¹³⁰ Tiend wachni koel, to kelo ler, kendo omiyo weche donjo kata ni ng’ama riekone tin.

¹³¹ Agamo yueyo, ka siso mar winjo chikeni oloya.

¹³² Duog ira mondo ibedna mang’won, kaka itimo pile ni joma oheri.

¹³³ Kik iwe apodhi, to sira kaka isesingori, kendo kik iwe richo hewa.

¹³⁴ Gola e lwet joma thira, mondo abed gi thuolo mar rito chikeni.

¹³⁵ Ler mar wang’i mondo orieny kuoma, kendo opuonja chikeni.

¹³⁶ Pi wang’a mol ka aora, nikech ji ok dew rito chikni.

Adiera ma Chik Nyasaye kelo

¹³⁷ A Ruoth Nyasaye, mano kaka in jaadiera! Chikeni oriere tir, kendo gin adier.

¹³⁸ Chike ma isegolo ni kare ahinya, kendo gin adier chuth.

¹³⁹ Mirima wang’o iya ka mach, nikech wasika ok dew chikeni.

¹⁴⁰ Singruok mari osetem, mi onwang’ ni en kare, miyo ahere, an jatichni.

¹⁴¹ An atin, kendo ok an gimoro, to wiya ok wil gi chikeni.

¹⁴² Timni makare nosiki nyaka chieng’, Kendo chikni en adiera pile.

¹⁴³ Achandora malit, kendo chunya parore to chikeni ema kelona mor.

¹⁴⁴ Chikeni ni kare nyaka chieng’, omiyo miya ang’egi mondo abed mangima.

Lemo mar resruok

¹⁴⁵ Aywakni gi chunya duto, A Ruoth Nyasaye. Yie idwoka mondo arit chikeni.

¹⁴⁶ Adier, aywakni, mondo iwara, eka aluw chikeni.

¹⁴⁷ Kapok piny oru, to aluongi mondo ikonya, kendo aketo genona duto kuom singruokni.

¹⁴⁸ Seche mag otieno asiko ka aneno, mondo apar wachni matut.

¹⁴⁹ Winja, A Ruoth Nyasacha, mana kaka herani mosiko obet, kendo miya abed mangima, mana kaka berni obet.

¹⁵⁰ Joma kwiny masanda, koro biro machiegni, to gibor gi chikeni.

¹⁵¹ In to, ichiegni koda, A Ruoth Nyasaye, kendo singruokni duto gin adier.

¹⁵² Asepuonjora chikeni duto chakre chon, kendo ang’eyo ni ilosogi mondo gisiki nyaka chieng’.

Ywagruok mikwayogo warruok

¹⁵³ Neye kaka achandora, kendo yie iwara, nikech wiya ok osewil gi chikni.

¹⁵⁴ Yalna mondo abed thuolo, kendo imi abed mangima kaka isesingori.

¹⁵⁵ Joricho ok noyud warruok, nikech ok girit chikeni,

¹⁵⁶ to ng’wononi duong’, A Ruoth Nyasaye, omiyo mi abed mangima kaka chikni obet.

¹⁵⁷ An gi wasigu mang’eny, kaachiel gi joma thira, to ok aseleng’ora maweyo chikeni.

¹⁵⁸ Ka arango andhokego, to chunya chido, nikech ok girit wachni.

¹⁵⁹ A Ruoth Nyasaye, neye kaka ahero chikeni. Omiyo mi mi abed mangima kaka herani mosiko obet.

¹⁶⁰ Mise mar chikni en adiera, kendo chikeni makare duto osiko nyaka chieng’.

Keto chuny kuom Chik Nyasaye

¹⁶¹ Joma nigi loch monja kayiem nono, to kata kamano, chikni ema aluoro.

¹⁶² Singruokni miya mor manadi! Amor mana ka ng’ama oyako mwandu mathoth!

¹⁶³ Asin gi miriambo, kendo ajokgo, to chikni ema ahero.

¹⁶⁴ Apaki dibiriyo odiechieng’ kodiechieng’, nikech buche makare ming’ado

¹⁶⁵ joma ohero chikeni nigi kue mar adier, kendo onge gima nyalo miyo gipodhi.

¹⁶⁶ A Ruoth Nyasaye, ageno ni ibiro wara, nikech atimo gik ma idwaro.

¹⁶⁷ Ee, arito chikeni, kendo aherogi gi chunya duto.

¹⁶⁸ Amako chikeni kod buche ming’ado, nikech ineno gik moko duto.

Lemo mar yudo konyruok

¹⁶⁹ A Ruoth Nyasaye, yie iwinj ywakna. Miya rieko kaka isesingori e wachni.

¹⁷⁰ Lemona otundi e nyimi, mondo iresa kaka ne isingori.

¹⁷¹ Pile anapaki, nikech ipuonja chikeni.

¹⁷² Anawer kapako chikeni, nikech giduto gin kare.

¹⁷³ Pile bed kiikori mar konya, nikech chikeni ema aseyiero.

¹⁷⁴ Mano kaka adwaro resruok moa kuomi! Chikeni ema miya mor, A Ruoth Nyasaye.

¹⁷⁵ Miya ngima mondo apaki. Chikeni bende mondo okonya.

¹⁷⁶ Abayo abaya ka rombo molal, omiyo bi mondo idwara, an jatichni, nikech wiya ok osewil gi chikeni.