Zaburi 116 - MUMA MALER 2015

Wer migoyogo ni Nyasaye erokamano kuom kony e tho

¹ Ahero Ruoth Nyasaye nikech owinjo kwayona. Adier, ochiko ite ni lemona

² e sa asaya ma aywaknee.

³ Tho ne otueya gi tondene, kendo masiche mag liel nolwora. Parruok gi kihondko nomaka!

⁴ Eka ne aywak ni Ruoth Nyasaye kawacho niya, “Ahombi Ruoth Nyasaye, yie iresa!”

⁵ Ruoth Nyasaye ber kendo ng’won. Adier, Nyasachwa en jakech ji.

⁶ Orito joma ok nyal konyore kendgi. Ne okonya kane an e chandruok.

⁷ A yaye chunya, bed gi geno, nimar Ruoth Nyasaye osebedona mang’won.

⁸ Oseresa e tho, kendo omiyo aweyo ywak, bende osekonyo tienda mondo kik chwanyre.

⁹ Kuom mano abiro wuotho e nyime, e piny joma ngima.

¹⁰ Kata kane awacho niya, “An gi masira marach ma dwaro nega,” to pod ne asiko mana kayie mana kuom Ruoth Nyasaye.

¹¹ Kata mana e kinde mane abedo maluor, kawacho niya, “Ji duto gin jomriambo,” to pod ne ayie ayia kuom Nyasaye.

¹² Ang’o ma dachiw ni Ruoth Nyasaye kuom ber duto mosetimona?

¹³ Abiro kelone misango miolo piny, mondo agonego erokamano kuom resa.

¹⁴ Bende gik mane asesingora ni nachiwne, abiro chiwone e chokruok mar joge duto.

¹⁵ Mano kaka lit ni Ruoth Nyasaye ka ng’ate moro otho!

¹⁶ A Ruoth Nyasaye, an jatichni, atiyoni mana kaka ne mama otiyoni. Isegonya, mi abedo thuolo!

¹⁷ Abiro chiwoni misango mar erokamano, kendo abiro lami.

¹⁸ Anachiwni gik ma asesingora ni nachiwni e chokruok mar jogi duto,

¹⁹ machokore e agolini mag Hekalu mari man Jerusalem. A yaye, pakuru Ruoth Nyasaye!