Zaburi 115 - MUMA MALER 2015

Nyasaye maradier kod kido manono

¹ In kendi, A Ruoth Nyasaye, ema nyaka iyud duong’, to ok wan, nikech adiera mari kod herani mosiko.

² Ang’o momiyo ogendini penjowa niya, “Ere Nyasachu nogo?”

³ Nyasachwa ni e polo malo, kendo otimo gimoro amora modwaro.

⁴ Nyisechegi, to lwet dhano ema oloso gi fedha kod dhahabu,

⁵ Gin gi dhok, to ok ginyal wuoyo, kendo gin gi wang’, to ok ginyal neno.

⁶ It bende gin go, to ok ginyal winjo, kendo gin gi um, to ok ginyal ng’uecho.

⁷ Gin gi lwedo, to ok ginyal mako gimoro, kendo gin gi tielo, to ok ginyal wuotho. Bende gionge gi dwol minyalo winjo.

⁸ Joma loso kidogo, kaachiel gi jogo mogeno kuomgi, chalo mana gi kido mane gilosogo!

⁹ Genuru kuom Ruoth Nyasaye, un jo-Israel! En ema okonyou, kendo oritou.

¹⁰ Un jodolo ma nyikwa Harun, genuru kuom Ruoth Nyasaye, nimar en ema okonyou, kendo oritou.

¹¹ Genuru kuom Ruoth Nyasaye un ji duto moluore! En ema okonyou kendo oritou.

¹² Ruoth Nyasaye parowa, kendo obiro guedhowa. Adier, obiro guedho jo-Israel, kod jodolo duto ma nyikwa Harun.

¹³ Ee, obiro guedho ji duto moluore, bed ni gin joma dongo kata joma tindo.

¹⁴ Ruoth Nyasaye onego omiu nyithindo mang’eny, un kaachiel gi nyikwau.

¹⁵ Onego Ruoth Nyasaye mane ochueyo polo gi piny guedhu.

¹⁶ Polo en mar Ruoth Nyasaye kende. Piny to nomiyo dhano.

¹⁷ Joma otho ma odhi e piny ma ji ok losie, ok pak Ruoth Nyasaye.

¹⁸ To wan, joma ngima, wabiro goyone erokamano pile kendo nyaka chieng’. A yaye, pakuru Ruoth Nyasaye.