Zaburi 114 - MUMA MALER 2015

Honni mane otimore kinde mane jo-Israel wuok Misri

¹ E kinde mane jo-Israel ma nyikwa Jakobo owuokie Misri, ma piny jomoko nono,

² Juda nodoko kama owal ni Ruoth Nyasaye, to Israel nodoko mwandune owuon.

³ Nam Makwar ne ogoyo wang’e kuom Ruoth Nyasaye, mi oringo. Aora Jordan to ne odok chien, moweyo mol.

⁴ Gode madongo nochikore ka diek. Gode matindo bende nochikore ka rombe.

⁵ Koro in Nam, ang’o momiyo ne iringo? Koso in aora Jordan, ere gimomiyo ne iweyo mol?

⁶ Un gode madongo, ere gimomiyo ne uchikoru ka diek? Koso un gode matindo, ang’o momiyo ne uchikoru ka rombe?

⁷ In piny, yiengni, ka Ruoth Nyasaye biro! Ee, tetni e nyim Nyasach Jakobo,

⁸ ma loko lwendni doko degni mag pi, kendo loko lwanda mogingore doko soko mamol.