Zaburi 111 - MUMA MALER 2015

Rit ma Nyasaye oritogo joge

¹ Pakuru Ruoth Nyasaye! Abiro goyone erokamano gi chunya duto e chokruok mar joge.

² Mano kaka gik ma Ruoth Nyasaye timo lich miwuoro! Ji duto mohero timbenego dwaro ng’eyo tiendgi.

³ Timbene opong’ gi duong’ kod luor, kendo timne makare ochwere nyaka chieng’.

⁴ Ruoth Nyasaye ok we wiwa wil gi timbene madongo. Ong’won kendo okecho ji.

⁵ Ji duto moluore, omiyo chiemo, bende wiye ok wil gi singruokne.

⁶ Osenyiso joge tekone, kuom miyogi pinje mag ogendini mamoko nono.

⁷ Gik moko duto motimo, otimo kare kendo gi adiera, bende chikene duto ogurore ma ok lokre.

⁸ Gisiko kinde duto nyaka chieng. Gin weche mogen kendo mar adier.

⁹ Ne okelo warruok ni joge, mi otimo kodgi singruok mosiko. Mano kaka nyinge ler, kendo duong!

¹⁰ Luoro Nyasaye e chakruok mar rieko, kendo joma timo kamano yudo rieko mang’eny. Nyaka pake mochwere!