Zaburi 108 - MUMA MALER 2015

Lemo mar resruok e lwet wasigu

¹ Aikora, A Nyasaye. Adier aikora chuth. Anawer, kendo anapaki. In chunya chiew!

² Un thumbe bende chakuru ywak. An to abiro chiew ka chieng’ pok owuok!

³ A ruoth Nyasaye anagoni erokamano e kind ogendini. Ee, anapaki e kind ji mae piny.

⁴ Herani mosiko kod adierani bor moyombo polo.

⁵ A Nyasaye, nyis tekoni gie kor polo, kendo duong’ni maler bende onenre gie kor polo,

⁶ Reswa gi tekoni, kendo dwok lemowa, mondo joma ihero oyud konyruok.

⁷ Nyasaye nowuoyo e kar dakne maler, kowacho niya, “Kaka koro aselocho, abiro dhi mondo apog dala mar Shekem, kaachiel gi holo mar Sukoth, ni joga.

⁸ Piny Gilead gi piny Manase gin maga. Efraim en oguta, to Juda en ludha mar loch.

⁹ Piny Moab to nobed karacha mar lwok, kendo Edom nobed kama aboloe wuochena. Jo-Filistia to anagonigi siboi.”

¹⁰ A Nyasaye, ere ng’ama biro tera e dala mochiel motegno? Koso en ng’a ma nokela Edom?

¹¹ Bende en adier ni isedagiwa? Donge ibiro dhi e lweny gi jolwenjwa?

¹² Konywa kedo gi wasikwa, nikech kony mar dhano ok nyal gimoro.

¹³ Ka Nyasaye konyowa to wabiro kedo gi chir, nikech en ema obiro loyonwa wasikwa.