Zaburi 103 - MUMA MALER 2015

Wer mipakogo Nyasaye kuom gueth

¹ A chunya, pak Ruoth Nyasaye! Dend nyinge maler, in tekra duto.

² A Yaye chunya, pak Ruoth Nyasaye, kendo wiyi kik wil gi ng’wonone duto.

³ En ema oweyona richona duto, kendo ochango tuochena pep.

⁴ Oresa e tho kendo oguedha gi hera kod ng’wono.

⁵ En ema omiya gik mabeyo mogundho e ngimana, omiyo anenora ng’ama pod tin, kendo man gi teko ka sibuor, kata ka ongo.

⁶ Ruoth Nyasaye ng’ado ni joma ithiro bura kare, kendo omiyogi gik ma owinjore giyudi.

⁷ Ne onyiso Musa gik mane ochano mondo otim, bende ne omiyo jo-Israel oneno timbene madongo.

⁸ En jang’wono kendo okecho ji. Iye ok wang’ piyo, bende onyiso herane mosiko.

⁹ Ok osik ka odhawnwa kinde duto, kendo ok osik kokecho.

¹⁰ Bende ok okumwa maromre gi richowa, kata chulonwa kuor moromo gi timbewa mamono ok ochulnwa.

¹¹ To kaka polo bor moyombo piny, e kaka hera moherogo joma oluore bende bor moyombo hera duto.

¹² Ogolo richowa kendo owitogi mabor kodwa, mana kaka yo wuok chieng’ bor gi yo podho chieng’.

¹³ Ruoth Nyasaye ohero joma oluore, mana kaka wuoro ohero wuode.

¹⁴ En ong’eyo gima ochuewago. Ong’eyo ni wan mana buru.

¹⁵ Ngima dhano chalo mana lum. Odongo, kendo onenore maber ka maua.

¹⁶ Bang’e yamo kudhe, kendo tere mabor, mi ng’ato ok chak nene kendo.

¹⁷ To hera ma Ruoth Nyasaye oherogo joma oluore osiko nyaka chieng’, bende ng’wonone ochwere kuom tienge duto

¹⁸ morito singruokne, kendo omako chikene gi adiera.

¹⁹ Ruoth Nyasaye noguro kom duong’ne e polo. En e ruodh gik moko duto.

²⁰ Pakuru Ruoth Nyasaye, un malaike madongo marateke, mawinjo wachne, kendo morito chikene.

²¹ Un ogend polo duto, pakuru Ruoth Nyasaye. Ee, un jotich matimo gik ma odwaro, pakeuru.

²² Dendeuru, un chuechne duto, kamoro amora ma lochne nitie. A yaye chunya, pak Ruoth Nyasaye!