Zaburi 101 - MUMA MALER 2015

Ruodh Israel osingore ni biro rito pinye gi adiera

¹ Wer ma aweroni, loso kuom ng’wono kod adiera, kendo in ema aweronigo, A Ruoth Nyasaye.

² Abiro keto chunya mondo atim tim makare. To ibiro biro ira karang’o? Abiro bedo gi ngima modimbore e oda.

³ Adier, abiro bet mabor gi richo. Asin gi timbe joma weyo Nyasaye, kendo ok nariwra kodgi kata matin.

⁴ Ok nabed jamganga ngang’ bende kata mana paro timo richo ok napar.

⁵ Anatiek ng’ato ang’ata maketho nying wadgi gi weche maricho, kendo ok nayie gi ng’at ma jasunga mochayo ji.

⁶ Anayie mana gi jogo ma oluoro Nyasaye, kendo anawe gidag koda. Ng’at ma jaadiera chutho ema nobed jatichna.

⁷ Onge ng’at ma jawuondre ma nodag e oda, kendo ok nane jamriambo e wang’a.

⁸ Odiechieng’ kodiechieng’ ananeg joricho e pinya. Anariemb joma timbegi mono duto e dala Ruoth Nyasaye.