Zaburi 10 - MUMA MALER 2015

Lemo mikwayogo mondo Nyasaye okum joricho

¹ A Ruoth Nyasaye, ere gimomiyo in mabor ahinya kodwa kamano? Ang’o momiyo ilalnwa e ndalo mag chandruok?

² Joricho sunga omako, kendo gisando joma odhier, omiyo onego obathgi giwegi makgi!

³ Jaricho pakore kuom gombone maricho. Odagi Ruoth Nyasaye kendo okwedo ka wuoro omake.

⁴ Owuoyo gi sunga niya, “Nyasaye ok dew gik ma atimo, omiyo ok obi kuma.” Mano e gima jaricho paro.

⁵ Odhi maber kuom gik moko duto motimo. Chik Nyasaye to odhiere winjo, kendo ocharo wasike achara.

⁶ Owacho e chunye niya, “Onge gima biro tama timo, kendo ok nayud chandruok ngang’.”

⁷ Wechene opong’ gi kuong’ kod miriambo kendo obwogo ji. Dhoge yot e wacho weche maricho mag ajara.

⁸ Obuto e mier, kendo onego ji maonge ketho ling’ling’. Bende ochengo ng’at ma odwaro nego, ka ng’atno kia gima timore.

⁹ Okiye kama opondoe mana ka sibuor. Ee, okiyo ng’at ma odwaro nego, ka ochike gi obadho nyaka omake, kendo oywaye kotere kuma odwaro.

¹⁰ Ng’atno bambore e lowo kosehinye, nikech teko mar jaricho ohewe.

¹¹ Jaricho wacho e chunye niya, “Nyasaye ok dew. Bende osemiyo wengene, kendo ok obi nena.”

¹² A Ruoth Nyasaye, bi mondo iresa. Kik wiyi wil gi joma ithiro.

¹³ Ere kaka jaricho nyalo jari, A Nyasaye, kowacho ni Nyasaye ok bi kume?

¹⁴ To adier ineno joma chandore kendo mokuyo, bende pile iikori mar konyogi. Ng’at ma ok nyal konyore chiwore e lweti, nikech pile isebedo kikonyo jochan gi nyithind kiye.

¹⁵ A Nyasaye, keth teko mar joricho kod joma acheje. Kumgi kuom timbegi maricho, nyaka chop girum chuth.

¹⁶ Ruoth Nyasaye, in e ruoth mochwere nyaka chieng’, kendo joma ok ong’eyi biro lal nono e pinyi.

¹⁷ A Ruoth Nyasaye, ichiko iti ni lemo mag joma obolore, kendo itego chunygi.

¹⁸ Bende iwinjo ywak joma ithiro, gi ywak nyithi kiye, kendo ing’adonigi bura kare, mondo kihondko kik chak mi giring giwe miechgi.