Ywagruok 5 - MUMA MALER 2015

Lemo mikwayogo ng’wono

¹ A Ruoth Nyasaye, parie gima osetimorenwa! Rangwa mondo ineye kaka wiwa okuot malit.

² Jopinje mamoko osekawo pinywa gi miechwa.

³ Wachalo gi nyithindo makiye, maonge gi wuonegi. Minewa bende chalo mond liete.

⁴ Pi mwamodho gi yien mwachwako wang’iewo ang’iewa, to gin mawa wawegi!

⁵ Wasandore malit gi jok mapek e ng’utwa. Inegowa gi tich, ma ok wanyal yudo yueyo.

⁶ Kinde moro ne wawinjore gi jo-Misri mondo omiwa chiemo, to kinde machielo bende ne wawinjore gi jo-Asuria kamano.

⁷ Kwerewa notimo richo mathoth, kendo koro gionge, to wan ema koro ikumowa nikech richogigo.

⁸ Wasumbni ema tinde tiyowa, kendo onge ng’ama nyalo resowa e lwetgi.

⁹ Wayudo chiembwa kwachiwo ngimawa, nikech jolweny manyalo monjowa nie thim.

¹⁰ Dendwa liet mana ka mach nikech tuo ma kech okelonwa.

¹¹ Mon gi nyiri ne omak gi thwon e Sayun kendo e miech Juda.

¹² Jodong gweng’ ne iliero gi luetegi e yien, kendo kata mana joma odong’ ok mi duong’.

¹³ Yawuowi ichuno mondo oregi. Wahia bende chandore gi ting’o yien mapek.

¹⁴ Jodongo tinde ok chokre e bura. Yawuowi bende oseweyo goyo thum.

¹⁵ Mor oserumo e chunywa, kendo miendwa olokore ywak.

¹⁶ Osimbwa mar duong’ bende osepodho. Yaye, masira ochomowa, nikech wan joricho.

¹⁷ Chunywa lit, kendo wang’wa lil

¹⁸ nikech got Sayun osejwang’, mi ondiegi ema bayoe.

¹⁹ To in Ruoth Nyasaye ilocho nyaka chieng’, kendo lochni osiko kuom tienge duto.

²⁰ Ere gimomiyo ijwang’owa kuom ndalo mang’enygi? Bende wiyi diwil kodwa nyaka chieng’ koso?

²¹ A Ruoth Nyasaye, duogwa iri mondo waduog iri. Yie mondo wabedi kaka ne wabet chon.

²² Koso isedagiwa chuth ka in gi mirima mager?