Ywagruok 2 - MUMA MALER 2015

Ruoth Nyasaye ema okelo ni Sayun thagruok

¹ Mano mudho mandiwa manade, ma Ruoth Nyasaye osekumogo Sayun, ka iye owang’! Hekalu mar Israel, ma duong’ne yande otundo nyaka e polo, osewito piny, chieng’ bura, ka ok oparo ni en raten tiende.

² Ruoth Nyasaye oseketho mier duto mag joka Jakobo, ka ok okechogi. Nomuko kuonde mochiel motegno e piny Juda ka en gi mirima mager. Ne omukogi nyaka e lowo, mokuodo wi jotelo, kodwoko loch pinyno chien.

³ Kane iye owang’, to ne onego joma rateke duto mag Israel, kendo kane wasigu biro, to ne ok okonyogi gi tekone maduong’. Oseliel e piny joka Jakobo ka mach mawang’o gik moko duto man bute.

⁴ Oseywayo atung’e ka omako matek gi bade ma korachwich, mana ka jasigu. Osenego joma beyo duto mwahero, mi oolo mirimbe mager ka mach kuom jo-Sayun.

⁵ Adier, Ruoth Nyasaye oselokore jasigu, mi otieko Israel. Osemuko udi madongo duto, kendo mier mochiel motegno oduoko piny, bende osekelo ni Jerusalem kuyo kod ywagruok.

⁶ Osegolo gik moko duto e Hekalu mare, mi odong’ nono mana ka kiru mowe e puodho. Adier, kama ler ma joge chokoree osemuko chuth. Ruoth Nyasaye osemiyo wi ji owil gi sewni madongo kod Sabato e Sayun, kendo osejwang’o ruoth kod jodolo ka iye owang’.

⁷ Osedagi kendone mar misango mi ojwang’o Hekalu mare. Nochiwo ut Sayun madongo e lwet wasigu, mi gigoyo koko e od Ruoth Nyasaye mana machal gi koko migoyo chieng’ sawo maduong’.

⁸ Ruoth Nyasaye osechano mondo omuk ohinga mar Sayun. Ne opime maber, kokethe mak oweyo, nyaka chop otieke pep. Omiyo ohingane oruombore piny, mi kuyo ema odong’.

⁹ Dhorangeyene bende osepodho piny, kendo Ruoth Nyasaye oseturo lodi mage matindotindo. Ruodh Sayun kod jodonge oke e kind ogendini mamoko, kendo chik Nyasaye koro ok ti. Jonabi mage bende koro ok yud fweny moa kuom Ruoth Nyasaye.

¹⁰ Jodonge obet piny, mi oling’ thi. Gisebuko wigi buru, kendo girwakore gi piende gugru. Nyi Jerusalem bende okulo wigi piny.

¹¹ Aseywak ahinya, mi wang’ a oowore kendo iya nyawni. Chunya bende chandore malit, nikech masira ma joga neno. Rawere gi nyithindo mayom nong’no tero, kendo gipodho e wang’yore mag dala.

¹² Ee, nong’no terogi, kendo gipodho e yore mag dala, kaka joma ohinyore. Giywak ka gikwayo minegi chiemo kod divai, to kata kamano chunygi chot mana e kor minegi.

¹³ Yaye Jerusalem, ere kaka daho chunyi? Ere chandruok ma dapim gi marino? Koso ang’o ma dapimgo, mondo aho chunyi, yaye Sayun? Adhondi duong’ ka nam! Ere ng’ama dithiedhi?

¹⁴ Fweny mane jonabini oneno, mi onyisi, ne ok adier, to ne gin mana miriambo lilo. Ok ne ginyisi timbeni mamono, mondo ichak idhi maber kendo, to fweny ma gisenyisi gin mana weche manono ma wito ji.

¹⁵ Yaye Jerusalem, ji duto makadho buti pamo lwetgi ka seyi. Gisicho, kendo gitwenyo umgi, ka gipenjore niya, “Adier, ma e dala ma ji luongo ni ‘Dala Maberie Moloyo’, kendo ni, ‘Dala Makelo Mor Ni Piny Ngima.’ ”

¹⁶ Wasiki duto yanyi marach kendo jari. Gisicho, kendo gigoyoni siboi ka giwacho niya, “Ero wasetieke! Ma e odiechieng’ ma wasebet kwarito! Adier, osechopo, mi wanene!”

¹⁷ To Ruoth Nyasaye osetimo gima nochano chon. Adier, osetimo gima nosiemo ji ni obiro timo. Oseketho gik moko ka ok odewo, kendo omiyo wasigu ogoyoni siboi komedo tekogi.

¹⁸ A Sayun, dala mochiel gi ohinga, ywag ni Ruoth Nyasaye gi chunyi duto. Pi wang’i mondo omol ka aora odiechieng gotieno. Kik iyue kata matin, kendo pi wang’i ki chogi.

¹⁹ A malo gotieno mondo iywag matek bang’ seche ang’wen ka seche ang’wen ka jorit lokoree. Weche duto manie chunyi, ol oko ka pi e nyim Ruoth Nyasaye. Ting’ bedeni malo kilame, mondo ores nyithindi ma nong’no tero e wang’yore duto.

²⁰ Yaye Ruoth Nyasaye, rang mondo ineye joma isesando malit! Bende mon dicham nyithindgi ma giserito maber? Koso jodolo gi jonabi dineg adier e Hekalu mari?

²¹ Joma dongo gi joma tindo duto nindo piny e wang’ yore. Nyiga gi yawuota lweny gi kech osenego. Isenegogi ka in gi mirima. Adier, isetiekogi ka ok ikechogi ngang’.

²² Ne iorona wasigu moa kuonde duto, mana ka ji machokore e nyasi moro maduong’. Onge kata ng’at achiel mane otony. Ooyo, onge ng’ato mane odong’ ka ngima, chieng’ mane inie gi mirima, A Ruoth Nyasaye. Ji duto mane anywolo maber kendo apidho, wasika osetieko pep.