Ywagruok 1 - MUMA MALER 2015

Lit ma dala Sayun neno

¹ Mano kaka dala Sayun mane ji ng’enyie tinde odong’ nono! Chon ogendini ne kwane ka dala maduong’, to koro osedong’ mana ka chi liel. Adier, chon ne en ruodh mier duto, to tinde ochalo mana ng’ama tiyo tich misumba.

² Oywak malit otieno duto, ka pi wang’e ridore e lembe. Kuom joherane duto, onge ng’ama nyalo kueyo chunye. Osiepene duto osendhoge, mi odoko wasike.

³ Kane jo-Juda osepodho, mi othirgi, ne otergi e tuech. Koro gidak e kind ogendini, to kuondego bende ok giyudie kue. Joma ne sandogi duto osejukogi, ke gin e thagruok malich kamano.

⁴ Yore madhi Sayun ywagore, nimar onge ng’ama luwogi, kadhi timo sawo kuno, kendo dhorangeye odong’ nono maonge ji. Jodolo mage omo chunygi malit, kendo nyige isando marach. Mano kaka en gi thagruok malich!

⁵ Wasike ema tinde oloye, kendo dhi nyime maber. Ruoth Nyasaye ema osekelone chandruok, nikech timbene mamono mokadho akwana. Wasike osemako nyithinde matindo, motero mabor e tuech.

⁶ Duong’ duto mane Sayun nigo oselal. Jodonge chalo gi le modenyo ma ok nyal yudo lum, kendo giringo ka gionge teko, ka wasikgi lawogi.

⁷ Jerusalem paro ndalo mane onenoe chandruok kod chuny lit, kane wasigu omako joge, to onge ng’ama nobiro mondo okonye. Wasike ne ogoyone siboyi, koneno ni osepodho.

⁸ Jerusalem ne timo richo mang’eny malich, mi olokore mana ka nanga mochido mowiti, kendo ji duto mane miye duong’ tinde ochaye, nikech giseneno duge. Koro ere gima dotim, mak mana omo chunye, kendo loko wang’e kucha?

⁹ Chilo ma en go omienore e lepe, to ne ok odewo gima biro timore achien. Mano emomiyo podho mosepodhogo lich miwuoro, kendo onge ng’ama nyalo hoyo chunye. Oywagore niya, “A Ruoth Nyasaye, neye chandruok ma an-go, nimar wasika oselocho!”

¹⁰ Wasigu osekawo mwandune duto. Oseneno joma ok jo-Israel ka donjo e Hekalu mare. Gin ogendini mane Ruoth Nyasaye, ikwero ni kik donji e chokruok maler, nimar en chokruok mari.

¹¹ Jo-Jerusalem duto ywagore ka kwayo chiemo. Giloko mwandugi mondo giyudgo chiemo, odwoknigi tekregi. Dala Jerusalem wacho niya, “A Ruoth Nyasaye, rang ineye kaka ikwana ka gima nono!

¹² Un duto mukadho ok dudewie wach malich machal kama? Mad urang uneye ka bende nitie chandruok machalo gi mara, ma Ruoth Nyasaye osesandago malit kokechoni.

¹³ Ne ooro mach gie polo modonjo e chokena. Nochiko obadho momako tiendena, mi odwoka chien. Oseweya ka adong’ kenda, ka tuo ramo denda odiechieng’ duto.

¹⁴ Osedhogo richona kuoma gi lwete owuon. Adier, ne oketo jok mare e ng’uta, mi pek mar jokno otieko tekra. Ruoth Nyasaye osejwang’a e lwet wasika, kendo ok anyal sirogi.

¹⁵ “Osenyono joga duto marateke, kendo oseluongo oganda lweny mang’ongo mondo otiek yawuota ma jolweny. Bende osenyono dala maduong’ mar Juda mana ka ng’ama nyono olemo mar bicho.

¹⁶ Mano emomiyo aywak ka pi wang’a ridore e lemba, nimar ng’at ma dikue chunya mi konya, ni kuma bor. Yawuota odhier nono, nikech wasika oselocho.”

¹⁷ Sayun ting’o bedene malo ka ywak, to onge ng’ama nyalo kueyo chunye. Ruoth Nyasaye osechiko ni mondo joma odak mokiewo gi joka Jakobo odok mamon kodgi. Jerusalem oselokorenigi ka nanga mochido mowiti.

¹⁸ Dala Jerusalem ywagore kama: “Ruoth Nyasaye osetimo gima kare, to an, dala Jerusalem ema asepiem kode, mi aweyo chikene. Ling’uru! Ling’uru un ogendini duto, mondo uneye chandruok ma an go! Nyiga gi yawuota osemak, moter e tuech.

¹⁹ Ne aluongo osiepena mondo okonya, to ne giwuonda awuonda. Jodolona kod jodonga notho e dalani, ka dwaro chiemo mondo oduoggo tekregi.

²⁰ A Ruoth Nyasaye neye kaka anie chandruok malit! Chunya chandore, kendo iya nyawni, nikech asepiem kodi marach ahinya. Lweny nego ji oko e thim, mana kaka tho bende neko dala e udi, kendo nyithindo dong’ kiye.

²¹ Winj kaka achur, to onge ng’ama kue chunya. Kane wasika duto owinjo chandruok ma an go, ne gidoko mamor kuom gima nitimo. To kel odiechieng’ mane isechiko, mondo gin bende gichal koda.

²² We mondo richogi duto okel e nyimi, kendo itimnigi mana kaka isetimona kuom richona duto, nikech achur malich ahinya, kendo chunya ool chuth.”