Wuok 40 - MUMA MALER 2015

Chungo Hema Maler kendo walogi

¹ Ruoth Nyasaye nowacho ni Musa niya,

² “Chieng’ due achiel mar due mokwongo, nyaka ichung Hema Maler, ma en Hemb Romo.

³ Ket Sandug Rapar e iye kendo igeng’ Sanduk gi pasia.

⁴ Kel mesa e iye, kendo ichanie gik moko duto monego obedie. Rachung taya bende ikel, mi imok teyni man kuome.

⁵ Ket kendo miwang’oe ubani e nyim Sandug Rapar, kendo igeng’ dho Hema Maler gi pasia.

⁶ To ket kendo-mar-misango e nyim dho Hema Maler, ma en Hemb Romo.

⁷ Ket karaya e kind Hemb Romo gi kendo-mar-misango, mi iolie pi.

⁸ Bang’e ichielne laru aluora gi pasia, kendo ilier pasia moro mondo ogeng’ dhoranga laru.

⁹ “Eka ikaw mor wir, iwirgo Hema Maler kod gik moko duto manie iye. Kamano inipwodhe kaachiel gi gige duto mondo obed gima ler ahinya.

¹⁰ Bang’e iwir kendo-mar-misango, kaachiel gi gige duto mondo obed maler ahinya.

¹¹ Bende iwir karaya kaachiel gi rachungine mondo iwalego.

¹² “Bang’e ikel Harun gi yawuote e dho Hemb Romo, kendo ilwokgi gi pi.

¹³ Eka irwak Harun gi lep dolo, kendo iwire gi mo, kiwale mondo obed jadolona.

¹⁴ Bang’ mano ikel yawuote machiegni, kendo irwaknigi kandhe.

¹⁵ Wirgi mana kaka isewiro wuon-gi, mondo gin bende gibed jodolona. Wirno biro miyo gibedo jodolona kaachiel gi nyikwagi kuom tiengegi duto nyaka chieng’.”

¹⁶ Musa notimo gik moko duto mana kaka Ruoth Nyasaye nochike.

¹⁷ Omiyo chieng’ due achiel mar due mokwongo e higa mar ariyo kane gia Misri, nochungo Hema Maler.

¹⁸ Nochunge kama: Nochano rachungi, morwakoe bepe, kendo noketo raripene mochungogo sirni.

¹⁹ Noyaro hema maoko e wi Hema maler, mi noume gi raumne kaka Ruoth Nyasaye nochike.

²⁰ Nokawo kite mag rapar moketo e sanduk. Norwako ludhe e ratege mag sanduk, eka noyieyo raum e wiye.

²¹ Noketo sanduk e Hema Maler, mogeng’e gi pasia. Kamano nogeng’o Sandug Rapar kaka Ruoth Nyasaye nochike.

²² Noketo mesa e Hemb Romo gi yo ka oko mar pasia, koma ochomo yo nyandwat,

²³ mochanoe makati miketo e nyim Ruoth Nyasaye pile mana kaka Ruoth Nyasaye nochike.

²⁴ Noketo rachung taya e Hemb Romo gi yo milambo koma omanyore gi mesa,

²⁵ moketo teyni kuome e nyim Ruoth Nyasaye, mana kaka Ruoth Nyasaye nochike.

²⁶ Noketo kendo-mar-dhahabu e Hemb Romo gi yo ka oko mar pasia,

²⁷ mowang’oe ubani mang’ue ng’ar mana kaka Ruoth Nyasaye nochike.

²⁸ Nogeng’o dho Hema Maler gi pasia,

²⁹ kendo noketo kendo-mar-misango e dho Hema Maler, ma en Hemb Romo. Notimoe misango mar mogo mana kaka Ruoth Nyasaye nochike.

³⁰ Noketo karaya mar lwok e kind Hemb Romo gi kendo-mar-misango, mooloe pi lwok.

³¹ Musa gi Harun gi yawuote ne lwokoe lwetegi gi tiendegi

³² ka gidonjo e Hemb Romo kata ka gidhi e kendo-mar-misango mana kaka Nyasaye nochiko Musa.

³³ Noliero pasia e aluora duto mar laru, mogeng’ogo Hema Maler kaachiel gi kendo-mar-misango, kendo noliero pasia moro e dhoranga laru. Kamano Musa notieko tich duto,

Bor polo olor ewi Hemb Romo

³⁴ mi bor polo noimo Hemb Romo, kendo duong’ maler mar Ruoth Nyasaye nopong’e.

³⁵ Musa ne ok nyal donjo e Hemb Romo nikech bor polo ne ni kanyo, bende nikech duong’ maler mar Ruoth Nyasaye nopong’e.

³⁶ E wuodh jo-Israel duto, ne ginyalo dhi e kambi moro mana ka bor polo oa e Hema Maler,

³⁷ to kane bor polo ok oa, ne ok gidhi nyime gi wuoth, to ne girito nyaka chieng’ moro oa.

³⁸ Kamoro amora mane jo-Israel dhiye, bor polo mar Ruoth Nyasaye nosiko ewi Hema Maler godiechieng’, to gotieno mach ne liel ei bor polono, kendo jo-Israel duto ne nyalo nene.