Wuok 39 - MUMA MALER 2015

Loso lep jodolo

¹ Ne gitiyo gi usi mambulu gi maralik kod makwar kuom loso lewni malich mane jodolo rwako ka gitiyo Kama Ler, kendo kuom loso ni Harun lep lemo kaka Ruoth Nyasaye nochiko Musa.

² Ne giloso law dolo miluongo ni efod gi dhahabu kod usi mambulu gi maralik kod makwar, kendo gi law katana maber.

³ Ne gipamo dhahabu nyaka odoko mareprep, mi ne gilire matindotindo, kendo ne gikade ka tol mondo jatweng’o molony oti kode kaachiel gi usi mambulu gi maralik kod makwar kod law katana maber.

⁴ Ne giloso ni efod misibe ariyo mitweyego e gok gi yo ka nyime kod kang’eye.

⁵ To okanda mane ni kuome nolos machal kode kendo en bende nolose gi dhahabu kod usi mambulu gi maralik kod makwar kod law katana maber, kaka Ruoth Nyasaye nochiko Musa.

⁶ Ne giloso kite mag berul, mi gichomo e otunge mag dhahabu, mondikie nying yawuot Israel e yo ma jagoro molony goroe.

⁷ Noketogi e misib efod ka rapar mar dhout Israel mana kaka Ruoth Nyasaye nochiko Musa.

⁸ Ne giloso law agoko e yo ma jatueng’o molony tueng’oe, ka gitiyo gi dhahabu kod usi mambulu gi maralik kod makwar, kod law katana maber mana kaka niloso efod.

⁹ Ne gilose maromre, mi gibane diriyo. Borne ne romo lwedo achiel, to lachne bende lwedo achiel.

¹⁰ Ne gichano kuome laini ang’wen mag kite ma nengogi tek. Laini mokwongo noketie sardius gi topaz kod karbunkal,

¹¹ to laini mar ariyo ne mar emarald gi safir kod diamond.

¹² Laini mar adek noketie jasinth gi aget kod amethust,

¹³ to laini mar ang’wen ne mar berul gi oniks kod jasper. Kidi ka kidi norwak e tunge mar dhahabu.

¹⁴ Kitego nondikie nying dhout Israel apar gariyo. Nogorgi ka kido, ma moro ka moro ne nigi nying achiel achiel mag dhoudi apar gariyogo.

¹⁵ Ne giloso ni law agoko thiwni mag dhahabu maler, molos ka tol mokadi.

¹⁶ Ne giloso otunge ariyo kod ratege ariyo mag dhahabu, eka ne giketo ratege ariyogo e riak law agoko gi malo koni gi koni.

¹⁷ Ne gitueyo thiwni ariyo mag dhahabu e ratege kande mane ni e riak law agoko koni gi koni.

¹⁸ To dho tondego komachielo ne gitueyo e otunge ariyo ka. Kamano e kaka ne gitudo law agoko gi misibe miriwogo ka nyim efod gi ka toke.

¹⁹ Ne giloso ratege ariyo mag dhahabu mi giriedo e riak law agoko gi yo ka mwalo kod yoka iye, koni gi koni kama omanyore gi efod.

²⁰ Bende ne giloso ratege ariyo moko mag dhahabu, mi girwako yo ka mwalo e dho misibe ariyo mag gok efod, but kama otuang’gigo e okanda.

²¹ Ne gitueyo ratege mag law agoko e ratege mag efod gi tol mambulu mondo law agoko olier e okanda gi malo, kendo kik ogonyre. Mano e kaka Ruoth Nyasaye nochiko Musa.

²² Ne giloso aroya mar umo efod gi law achiel mambulu.

²³ Notuch diere ma wich wuokie, kendo aluora mar kama otuchino notwang’ gi pien, mondo kik yiechi.

²⁴ E riak lawno aluorane ne gitwang’o gik mong’inore ka machunga, molos gi usi mambulu gi maralik kod makwar, kod law katana maber.

²⁵ Bende ne giloso gara mag dhahabu, mi giketo e riak law alwora e kind gik mong’inorego.

²⁶ Kamano gara nokikore gi gik mong’inore ong’inore e laini achiel e aluora mar riak lawno mogik piny. Lawno nirwako pile kitiyo tich dolo kaka Ruoth Nyasaye nochiko Musa.

²⁷ Ne gitwang’o kandhe ni Harun gi yawuote,

²⁸ kendo ne gilosonigi kilemba gi ogute gi sirweche

²⁹ kod okanda. Gigo duto nolos gi law katana maber mogoe maradadi gi usi mambulu gi maralik kod makwar, eyo ma jagoro molony goyoe. Mago duto ne gitimo mana kaka Ruoth Nyasaye nochiko Musa.

³⁰ Ne giloso gima opamore ka san gi dhahabu maler mondo obed osimbo maler kendo ne gindiko kuome ni, “MOWAL NI RUOTH NYASAYE” wechego nogor mana e yo ma jagor kidi goroe.

³¹ Ne gitueyone tol mambulu mondo oketego e kilemba gi yo ka malo, mana kaka Ruoth Nyasaye nochiko Musa.

Tich loso Hema Maler orumo

³² Tije duto mag Hema Maler, ma en Hemb Romo ma Nyasaye romoe gi joge norumo. Jo-Israel notimo gik moko duto mana kaka Ruoth Nyasaye nochiko Musa.

³³ Ne gikelo ni Musa Hema Maler gi hema ma oko kod gige duto, kaka ramekni gi bepe gi rariw gi sirni kod rachungi,

³⁴ gi raum molos gi piende imbe molok gi range makwar, kod raum molos gi piende monyong’ kod pasia mogeng’o sanduk,

³⁵ gi Sandug Rapar, gi ludhene, gi raum,

³⁶ kod mesa gi gige duto gi makati miketo e nyim Nyasaye pile,

³⁷ kod rachung taya molos gi dhahabu maler, kaachiel gi teyni miketo kuome, gi gige duto, kod mor taya,

³⁸ gi kendo mar dhahabu, gi mor wir, gi ubani mang’ue ng’ar, gi pasia mar dho Hema,

³⁹ kod kendo-mar-misango molos gi mula gi gire mar mula machalo gi sing’enge, gi ludhene kod gige duto, gi karaya kod rachungine

⁴⁰ gi pasia mag laru, gi sirni mage kod rachungine, kaachiel gi pasia man e dhoranga laru, gi tondene kod loyene gi gik moko duto mitiyogo tich Hema Maler, ma en Hemb Romo.

⁴¹ Ne gikelo bende lewni motwang’ malich ma jodolo tiyogo e Kama Ler, tiende ni lep lemo mag Harun jadolo kod lep yawuote ma girwako ka gitiyo tich dolo.

⁴² Jo-Israel nosetimo tije duto mana kaka Ruoth Nyasaye nochiko Musa.

⁴³ Musa norango gik moko duto mane giseloso, moneno ni giselosogi mana kaka Ruoth Nyasaye nosechiko, omiyo noguedhogi.