Wuok 37 - MUMA MALER 2015

Loso Sanduk mar Nyasaye

¹ Bezelel noloso Sanduk gi yiend shita, ma borne oromo mita achiel, to lachne nus mita, kendo borne modhi malo bende nus mita.

² Nobawe gi dhahabu maler iye gi oko, kendo nolosone ndiga mar dhahabu molworo bethene duto.

³ Nothedhone ratege ang’wen mag dhahabu, moketo e tiende ang’wen. Ratege ariyo nobet e bathe konchiel, to ariyo e bathe komachielo.

⁴ Noloso ludhe ariyo gi yiend shita, mobawo gi dhahabu,

⁵ kendo norwakogi e ratege manie bath Sanduk koni gi koni mondo gibed mag ting’e.

⁶ Bende nolosone raum mar dhahabu maler ma borne oromo mita achiel to lachne nus mita, obed kar ng’wono.

⁷ Nothedho kerubi ariyo mag dhahabu, mondo obed gimoro achiel gi raum.

⁸ Kerubi achiel noketo e dho raum konchiel, kendo achiel e dhoge komachielo.

⁹ Ne gibedo ka bwombegi oyarore kochomo malo mondo ogeng’ raum, kendo ne gimanyore, ka ging’iyo raum.

Loso mesa mar makati

¹⁰ Bezalel noloso bende mesa gi yiend shita, ma borne oromo mita achiel, to lachne nus mita, kendo borne modhi malo bende nus mita.

¹¹ Nobawe gi dhahabu maler, kendo nolosone ndiga mar dhahabu molworo bethene duto.

¹² Nochueyo mithe alwora ma lachne oromo tat lwedo achiel, kendo nochueyo dir mitheno gi dhahabu.

¹³ Nothedhone ratege ang’wen mag dhahabu, moketo, e kendo ang’wen mag mesa, kama tiendene nitie, mondo obed mag ting’e.

¹⁴ Ratege mane orwakie ludhe miting’ego noket e mithe.

¹⁵ Noloso ludhego gi yiend shita, mobawo gi dhahabu.

¹⁶ Bende noloso gik mitiyogo e mesa, kaka tewni, gi kikombe gi agulni kod aguetni mitiyogo gitimo misengni miolo piny. Gigo duto noloso gi dhahabu maler.

Loso rachung taya

¹⁷ Noloso rachung taya gi dhahabu maler. Tiende gi kore noloso gi dhahabu mothedhi, kendo maupe ma nogorie, kaachiel gi thiepege kod obokegi nobedo gimoro achiel kode.

¹⁸ Ne en gi bede auchiel moa e bathe koni gi koni, adek e bathe konchiel kendo adek e bathe komachielo.

¹⁹ Bedenego moro ka moro ne nigi maupe adek molos gi thiepegi kod obokegi machal gi thiep oyungu.

²⁰ E kor rachung taya hie ne nitie maupe ang’wen man gi thiepe kod oboke machal gi thiep oyungu.

²¹ Bedene ariyo ariyo ne nigi maua achiel achiel e bwogi.

²² Maupego gi bedego kod rachungi nobedo gimoro achiel mothedh gi dhahabu maler.

²³ Bende noloso ni rachungino teyni abiriyo gi rangis teyni kod tewni. Mago duto noloso gi dhahabu maler.

²⁴ Rachung taya kod gige duto nolos gi dhahabu maler moromo kilo piero abich.

Loso kendo miwang’oe ubani

²⁵ Noloso kendo miwang’oe ubani gi yiend shita. Noromre koni gi koni. Borne ne nus mita, kendo lachne bende nus mita, to borne modhi malo mita achiel. Tungene nobedo gimoro achiel kode.

²⁶ Nobawe duto te gi dhahabu maler, kendo nochueyo laini mar dhahabu molworo bethene duto.

²⁷ Nolosone ratege ariyo ariyo mag dhahabu, moketo e bwo laini e konde ariyo man koni gi koni, mondo orwakie ludhe miting’ego.

²⁸ Ludhego noloso gi yiend shita, mobawo gi dhahabu.

²⁹ Noloso bende mo maler mar wir, kod ubani maler mang’ue ngar.