Wuok 35 - MUMA MALER 2015

Chike mag Sabato

¹ Musa noluongo jo-Israel duto, mowachonigi niya, “Ruoth Nyasaye osechikou ni mondo uti kama:

² Unyalo tiyo kuom ndalo auchiel, to chieng’ mar abiriyo nyaka bednu chieng’ yueyo maler, nimar en Sabato mowal ni Ruoth Nyasaye. Ng’ato ang’ata motiyo chieng’no nyaka negi.

³ Kik umok kata mana mach e miechu chieng’ Sabato.”

Chiwo mokel ni Ruoth Nyasaye

⁴ Musa nowacho ni jo-Israel duto niya,

⁵ “Ruoth Nyasaye nosechiko ni mondo uchiwne mich. Ng’ato ka ng’ato moyie timo kamano, mondo okelna chiwo mag dhahabu kod mula,

⁶ gi nanga mambulu gi maralik kod makwar, gi law katana maber, gi yie diek,

⁷ gi piende rombe molok gi range makwar, gi piende monyong’ gi yiend shita,

⁸ gi mor taya, kod gik mang’ue ng’ar milosogo mor wir, gi ubani mang’ue ng’ar,

⁹ gi kite mag oniks kod kite moko miketo kuom law dolo miluongo ni efod, kendo kuom law agoko.

Gik moket e Hema Maler

¹⁰ “Jotich duto molony man kuomu mondo obi, kendo olos gik moko duto mane Ruoth Nyasaye ochiko.

¹¹ Ginilos Hema Maler, gi hembe maoko, kod raumne, gi ramekni mage, gi bepene, gi raripene, gi rachungine,

¹² kod Sanduk gi ludhene miting’ego, gi raumne, kod pasia mogeng’e,

¹³ gi mesa kod ludhene gi gige duto, gi makati miketo e nyim Nyasaye pile,

¹⁴ kod rachung taya machiwo ler, kod gige duto, gi teyni mage kod mor taya,

¹⁵ gi kendo-mar-misango miwang’oe ubani kaachiel gi ludhene, kod mor wir gi ubani mang’ue ng’ar, gi pasia manie dho hema,

¹⁶ kod kendo-mar-misango miwang’o pep, kaachiel gi ndiri mare molos gi mula, gi ludhene kod gige duto, gi karaya, kod rachungine,

¹⁷ gi pasia mag laru gi sirni kod rachungigi gi pasia mar dhoranga laru,

¹⁸ kod loye mag Hema gi loye mag laru kod tondegi,

¹⁹ kaachiel gi lewni malich ma jodolo tiyogo Kama Ler, ma gin lep lemo ma Harun jadolo gi yawuote rwako ka gitiyo tich dolo.”

Ji okelo Chiwo

²⁰ Oganda jo-Israel duto nowuok oa ir Musa.

²¹ Ng’ato ka ng’ato ma noyie golo chiwo ni Ruoth Nyasaye notimo kamano, mondo olosgo Hemb Romo gi gik moko duto mitiyogo kanyo, kaachiel gi lep lemo.

²² Mon gi chwo nobiro, kendo ng’ato ka ng’ato ma noyie golo chiwo nokelo ngaga gi sitadi gi bony gi mula kod gimoro amora maber mar dhahabu. Ji duto nokelo ni Ruoth Nyasaye chiwo mag dhahabu,

²³ to bende ng’ato ka ng’ato nokelo gima en go kaka nanga mambulu kata maralik kata makwar, kata law katana maber, kata yie diek, kata piende rombe molok gi range makwar.

²⁴ Joma ne nyalo chiwo mich mag fedha gi mag mula nokelo ni Ruoth Nyasaye. Kendo ji duto mane ni gi yiend shita mane inyalo losogo gimoro amora bende nokelo.

²⁵ Mon duto mane olony e wicho nowiyo usi mambulu gi maralik gi makwar mokelo, kaachiel gi law katana maber.

²⁶ Bende mon duto mane olony e tich wiyo yie diek nowicho gi chuny achiel.

²⁷ Jodongo nokelo kite mabeyo mag oniks gi kite miketo kuom efod kendo kuom law agoko,

²⁸ kaachiel gi gik mang’ue ng’ar kod mor taya gi mor wir kod mor ubani mang’ue ng’ar.

²⁹ Jo-Israel duto machwo gi mamon mane oyie golo chiwo ni tich duto mane Ruoth Nyasaye osechiko Musa ni mondo otim, nokelo ni Ruoth Nyasaye michgi.

Luong mar Bezalel gi Oholiab

³⁰ Musa nowacho ni jo-Israel niya, “Ruoth Nyasaye oseyiero Bezalel wuod Uri ma wuod Hur ja Juda.

³¹ Osepong’e gi Rohone, mondo obed gi lony kod nyalo kaachiel gi rieko mar ng’eyo tije duto mag lwedo,

³² kaka goro kido mabeyo mag dhahabu gi fedha kod mula,

³³ kendo ng’ado kite michomo, kaachiel gi payo bao, kata tich moro amora mar lwedo.

³⁴ Ruoth Nyasaye osemiyo Bezalel gi Oholiab wuod Ahisamak ma ja Dan, teko, mondo gipuonj ji tich lwedo.

³⁵ Osemiyogi rieko mathoth mar tiyo tije duto mag lwedo, kaka tich goro kite, gi mar kwoyo nanga, gi mar tweng’o gi usi mambulu gi maralik, gi mar loso law katana maber, kod mar chweyo nanga. Gin ji manyalo timo tich moro amora.