Wuok 34 - MUMA MALER 2015

Kite ariyo mamoko

¹ Ruoth Nyasaye nowacho ni Musa niya, “Pa kite ariyo machal gi mane igoyo piny, mobarore kande, mondo andikie weche mane ni e kite mokwongogo.

² Kiny iikri gokinyi mondo ibi e got Sinai. Ichung’ kuno, kendo irita.

³ Ng’ato kik idh kodi kuno, bende ng’at moro kik bed kamoro amora ewi godno, kata mana jamni kik kwa e alwora ne.”

⁴ Kuom mano Musa nopayo kite ariyo machal gi mokwongo. Kinyne gokinyi nodhi ewi got Sinai, kaka Ruoth Nyasaye nosechike koting’o kitego.

⁵ Eka Ruoth Nyasaye nolor e bor polo, mochung’ bute kanyo, mi ohulo nyinge ma JEHOVA.

⁶ Nokadho e nyim Musa, kowacho gi dwol maduong’ niya, “An JEHOVA. An Ruoth Nyasaye, an Nyasaye ma jang’wono kendo makecho ji. Iya ok wang’ piyo, kendo anyiso hera mosiko kod adiera.

⁷ Arito singruokna masetimo gi ji gana gi gana, kendo aweyonigi rochruokgi gi kethogi kod richogi, to kata kamano ok akwan jaketho ka ng’ama ler, to akumo nyithindo gi nyikwayo nyaka tieng’ mar adek kod mar ang’wen nikech richo kweregi.”

⁸ Musa nokulore piny piyopiyo, molemo.

⁹ Nowacho niya, “A Ruoth Nyasaye, kimor koda adier, to koro akwayi mondo idhi kodwa, jogi tokgi tek, to kata kamano, yie iwenwa kethowa gi richowa, kendo ikawwa ka mwanduni iwuon.”

Nyasaye ochako otimo singruok gi jo-Israel

¹⁰ Ruoth Nyasaye nowacho niya, “Koro adwaro timo kodu singruok. Abiro timo honni madongo ka jou neno, ma nyaka nene pok otim e piny ngima, kata e oganda moro. Ji duto ma un e kindgi biro neno gima an Ruoth Nyasaye anyalo timo, nikech abiro timonu gima lich.

¹¹ Kuom mano, rituru chike ma abiro miyou kawuono, eka abiro riembo jo-Amor gi jo-Kanaan gi jo-Hiti gi jo-Perizi gi jo-Hivi kod jo-Jebus mondo owenu thuolo.

¹² Ritreuru mondo une ni ok utimo winjruok moro gi jopiny mudhiyeno, nono to gilokorenu obadho.

¹³ Nyaka umuk kendegi mag liswa, kendo uketh sirni maggi milamo, mag kite gi mag yien.

¹⁴ “Kik ulam nyasaye moro machielo ni mar an Ruoth Nyasaye, nyinga en Nyasaye ma Janyiego, kendo an Nyasaye ma janyiego adier!

¹⁵ Ritreuru mondo kik utim winjruok gi jopinyno nikech ka gilamo nyisechegi, kendo gitimonigi liswa, to gibiro luongou, mi kamoro dipo ka uchamo chiemb liswechegi.

¹⁶ Yawuotu bende dikend nyigi, to mondgigo dilam nyisechegi, mi gimi yawuotu weya, kendo lam nyisechegigo.

¹⁷ “Kik ulos nyiseche mag mula mondo ulam.

¹⁸ “Rituru Sawo mar Makati ma ok oketie Thowi, kaka asechiki. Nyaka ucham makati ma ok oketie thowi kuom ndalo abiriyo e ndalo mar Abib, nikech dueno ema ne ua e piny Misri.

¹⁹ “Nyithindo makayo ma chwo duto mag dhano kata mag jamni gin maga.

²⁰ To ngima kanyna makayo unyalo waro gi nyarombo, to ka ok udwar ware, to nyaka tur ng’ute. Ng’ato ka ng’ato nyaka war ngima wuode makayo, kendo onge ng’at ma nobi ira gi lwete nono.

²¹ “Unuti kuom ndalo auchiel, to chieng’ mar abiriyo nyaka uyue, kata obedo ni en kinde mag pur kata mag keyo.

²² “Nyaka urit Sap Jumbe, tiende ni sap chiwo mar cham mokwongo nyak. To bende nyaka urit Sap Pono Olembe e giko higa.

²³ “Jou machwo duto nyaka bi e nyima didek e higa, an Ruoth Nyasaye ma Nyasach Israel

²⁴ nimar kaseriembonu ogendini ma weg pinyno, kendo ayaro pinyu, to onge wasigu ma notem kawo pinyu e kinde adek mubiro biroe e nyima higa ka higa.

²⁵ “E kinde mutimoe misango ni chiayo, kik uchiw gimoro moketie thowi, kendo kik uwe ring chiayo motimgo Sap Pasaka dong’ nyaka piny ru mak uwang’o te.

²⁶ “Cham mabeyoe moloyo mukwongo kayo nyaka ukel e Od Ruoth Nyasaye ma Nyasachu. “Kitedo nyadiel, to kik uolie cha min.”

²⁷ Ruoth Nyasaye nowacho ni Musa niya, “Ndik wechego, nikech gin ema atimogo singruok kodi kaachiel gi jo-Israel.”

²⁸ Omiyo Musa nobet gi Ruoth Nyasaye kanyo kuom ndalo piero ang’wen, odiechieng’ gotieno, ma ok ochiemo kata metho, kendo nondiko weche mag singruokno e kitego. Ne gin Chike Apar.

Musa olor oa e got Sinai

²⁹ Kane Musa lor a e got Sinai, koting’o kite ariyo mag rapar, wang’e ne rieny nikech nosewuoyo gi Ruoth Nyasaye, to kata kamano ne ok ong’eyo ni wang’e rieny kamano.

³⁰ Harun gi jo-Israel duto norango Musa moneno ka wang’e rieny, mi ne giluor sudo bute.

³¹ To Musa noluongogi, mi Harun gi jodong oganda nodok ire, moloso kodgi.

³² Bang’ mano jo-Israel duto nodhi irgi machiegni, kendo Musa nomiyogi chike duto mane Ruoth Nyasaye omiye e got Sinai.

³³ Kane Musa osetieko wuoyo kodgi, nogeng’o wang’e gi law,

³⁴ E kinde duto mane Musa donjo e hemb Ruoth Nyasaye mondo olos kode, nogolo lawno e wang’e nyaka owuog oko. To pile kane owuok mondo onyis jo-Israel weche duto ma nochike ni mondo owachi,

³⁵ ne gineno wang’e ka rieny. Eka bang’e nogeng’o wang’e kendo, nyaka odonj e hema, mondo owuo gi Ruoth Nyasaye.