Wuok 32 - MUMA MALER 2015

Nyaroya molos gi dhahabu

¹ Kane ji oneno ni Musa osedeko e got, kapok olor piny, ne gichokore kuom Harun, mi giwachone niya, “Bi ilosnwa nyasaye mondo otelnwa, nikech wakia gima osetimo ng’at ma Musano, mane ogolowa e piny Misri.”

² Harun nodwokogi niya, “Deduru bonje mag dhahabu ma mondu gi yawuotu kod nyiu orwako mondo ukelna.”

³ Mi ji duto nogolo bonjegi, motero ni Harun.

⁴ Nokawo bonjego molenyo, eka noolo e gimoro mokuny iye e kido mar nyaroya, molosogo nyaroya. Jo-Israel nowacho niya, “Ma e nyasaye mane ogolowa e piny Misri!”

⁵ To kane Harun owinjo gima giwachono, nogero kendo-mar-misango e nyim nyaroyano. Eka nogoyo milome, kowacho niya, “Kiny wanatim sawo mwamiyogo Ruoth Nyasaye duong’.”

⁶ Kinyne ji nochiew gokinyi mang’ich, motimo lisweche miwang’o pep, kendo ne gikelo lisweche mag sawo. Ne gibet piny mondo gichiem, kendo gimethi, to bang’e ne gia malo mondo gitugi.

⁷ Ruoth Nyasaye nowacho ni Musa niya, “Lor piyopiyo, nikech jou mane igolo Misri osetimo marach.

⁸ Piyopiyo nono giseweyo yo mane achikogi ni mondo giluw, mi giseloso nyaroch dhahabu mondo gilam. Gisekulorene, kendo gisetimone liswa, ka giwacho niya, ‘A jo-Israel, ma e nyasaye ma nogolowa e piny Misri.’ ”

⁹ Ruoth Nyasaye nomedo wacho ni Musa niya, “Aserango jogi, maneno ni gin joma wigi tek.

¹⁰ Koro weya mondo atiekgi gi mirimba mager. Bang’e anamiyi doko oganda maduong’.”

¹¹ To Musa nohombo Ruoth Nyasaye ma Nyasache, kowachone niya, “A Ruoth Nyasaye, ang’o momiyo iwang’o jogi gi mirimbi? Donge gin jogi mane igolo Misri gi teko maduong’?

¹² Ang’o momiyo imiyo jo-Misri biro wacho, niya, ‘Ruoth Nyasaye nogolo jo-Israel Misri mana ni mondo otimnigi marach, konegogi e gode, kendo otiekgi chuth’? Yie iwe mirimbi mager, kendo ilok paroni, mondo kik ikel masirani kuom jogi.

¹³ Par jotichni ma Ibrahim gi Isaka kod Israel, kendo kaka nikuong’orinigi gi nyingi iwuon, kiwacho niya, ‘Anamiu nyikwayo mang’eny ka sulue ma e polo, kendo anamigi pinyni duto kaka nasingora, ni nobed margi nyaka chieng’.’ ”

¹⁴ Omiyo Ruoth Nyasaye noloko parone, mi koro ne ok okelo ni joge masira mane osewacho.

¹⁵ Musa nowichore molor oa e got, koting’o kite ariyo mag rapar e lwete. Kitego nondiki koni gi koni.

¹⁶ Ne gin tich Nyasaye, kendo ndiko mane ni kuomgi ne mar Nyasaye.

¹⁷ Joshua nowinjo ka ji goyo koko, mowacho ni Musa niya, “Awinjo mahu mar lweny e kambi.”

¹⁸ To Musa nodwoke niya, “Mano ok agoro mar joma oloyo lweny, bende ok en ywak mar joma olo e lweny, to en mana koko mar joma wer.”

¹⁹ Kane Musa osesudo machiegni gi kambi, noneno nyaroya, kendo noneno ji ka miel, mi nokecho malich. Nowito kitego piny e tiend got mobarore.

²⁰ Nokawo nyaroya mane ji oselosono mowang’o. Norege, molokore buru, eka nokire e pi, momiyo jo-Israel pigno omodho.

²¹ Nopenjo Harun niya, “Ang’o ma ne jogi otimoni momiyo imiyo gitimo richo maduong’ kama?”

²² Harun nodwoke niya, “Ruoth, kik ikechi. Ing’eyo ang’eya kaka chuny jogi richo.

²³ Ne giwachona niya, ‘Losnwa nyasaye mondo otelnwa, nikech wakia gima osetimo Musani, ma nogolowa e piny Misri.’

²⁴ Omiyo nawachonigi mondo joma nigi dhahabu oded oko. Ne gimiya dhahabugo, mabolo e mach, mi nyaroyano ema owuok.”

²⁵ Kane Musa oneno ka ji osenjawni, nikech Harun noseweyo ni wasikgi thuolo mondo ojargi,

²⁶ nochung’ e dhoranga kambi, mogoyo koko niya, “Eke joma ni kor Ruoth Nyasaye? Biuru ira!” Mi jo-Lawi duto nochokore ire.

²⁷ Nowachonigi niya, “Ruoth Nyasaye ma Nyasach Israel owacho ni, ng’ato ka ng’ato kuomu mondo orwak liganglane, kendo ong’ad e dier kambi koa e dhorangach ma koni nyaka dhorangach ma kocha. Ng’ato ka ng’ato mondo oneg owadgi gi osiepne kod ng’at modak bute.”

²⁸ Jo-Lawi notimo kaka Musa nosechikogi, kendo chieng’no ji alufu adek notho.

²⁹ Eka Musa nowachonigi kendo niya, “Kawuono usewaloru ni tich Nyasaye chuth, nikech usenego yawuotu kod oweteu, omiyo Ruoth Nyasaye oguedhou tinende.”

³⁰ Kinyne Musa nowacho ni ji niya, “Usetimo richo maduong’. To koro abiro idho got, mondo adhi ir Ruoth Nyasaye. Kamoro onyalo yie weyonu richou ka akwaye.”

³¹ Kamano Musa nodok ir Ruoth Nyasaye mowachone niya, “Yie iwinj wachna. Jogi osetimo richo maduong’ ahinya! Giseloso nyasaye mar dhahabu mondo gilam.

³² To koro yie iwenigi richogi. Ka ok iyie timo kamano, to kara yie iruch nyinga oko e kitabu misendiko.”

³³ Ruoth Nyasaye nodwoko Musa niya, “Ng’at motimo richo e nyima ema naruch nyinge e kitapa.

³⁴ Koro dhiyo mondo itel ni ji nyaka kuma nasenyisi. Malaikana notel nyimi, to kinde biro chopo ma anakumgie kuom richogi.”

³⁵ Bang’e Ruoth Nyasaye nogoyo jo-Israel gi tuo kuom lamo nyaroya mane Harun oloso.