Wuok 29 - MUMA MALER 2015

Keto Harun gi yawuote e tich dolo

¹ “Kiwalo Harun gi jowuote mondo obed jodolona, to nyaka itim kama: Kaw nyarwath kod imbe ariyo maonge gi songa.

² Bende ikaw makati, kek moted gi mo, kod chapat mowirie mo. Magi duto nyaka los gi mok ngano mayom, ma ok oketie thowi.

³ Iketgi e odheru, kendo ikelgigo. Bende ikel nyarwath gi imbe ariyo kande.

⁴ Bang’e ikel Harun gi yawuote e dho Hemb Romo kendo ilwokgi.

⁵ Eka ikaw lewni kande, ma gin kandhu gi aroya maumo efod gi efod wuon, kod law agoko, irwak ni Harun, kendo ituene efod gi okandane.

⁶ Sidhne kilemba, kendo ituene gima opamore cha, ma en osimbo maler.

⁷ Eka ikaw mor wir, iol e wiye kiwalego.

⁸ Bang’ mano ikel yawuote, mi irwaknegi aroche,

⁹ kendo ituenigi okanda e nungogi, bende isidhnigi kilemba. Mano e kaka iniket Harun gi yawuote e tichgi, kendo ginibed jodolo mosiko nyaka chieng’.

¹⁰ “Kel nyarwath e nyim Hemb Romo, kendo Harun gi yawuote oket luetgi e wiye,

¹¹ eka iyange e nyim Ruoth Nyasaye e dho Hemb Romo kanyo.

¹² Kaw rembe moko, imien gi lith lweti e tunge kendo-mar-misango. To remo duto modong’ iol e tiend kendono.

¹³ Eka ikaw boche duto mogawo jambich, gi atel man kuom chuny, kod nyirokene, kaachiel gi boche mogawogi, kendo iwang’gi e kendo-mar-misango.

¹⁴ To ring nyarwath kod piene, kaachiel gi ich iwang’ e tok kambi oko, nikech en misango mar golo richo.

¹⁵ “Bang’ mano ikaw achiel kuom imbe kande, kendo Harun gi yawuote oket luetgi e wiye.

¹⁶ Eka iyange, kendo ikaw rembe, ipuk e kor kendo-mar-misango.

¹⁷ Ipoge lemo lemo, kendo ilwok jambiye kod tiendene, mi iketgi kaachiel gi ringe moko kod wichne.

¹⁸ Eka iwang’ imno duto e kendo-mar-misango. Mano en misango miwang’o pep ni Ruoth Nyasaye. En tik mang’ue ng’ar moa kuom misango miwang’o ni Ruoth Nyasaye.

¹⁹ “Kaw im mar ariyo, kendo Harun gi yawuote oket luetgi e wiye.

²⁰ Eka iyange, kendo ikaw rembe moko mondo imien e it Harun makorachwich kod it yawuote ma korachwich kod lith luetegi mathwon makorachwich kod lith tiendegi mathwon bende. To remo modong’, ipuk e kor kendo mar-mar-misango koni gi koni.

²¹ “Kaw remo moko manie wi kendo-mar-misango, kod mor wir, mi ikir kuom Harun gi yawuote, kendo kuom lepgi, kamano Harun gi yawuote kaachiel gi lepgi nodok maler.

²² Kaw bor im, gi sembe kod boche mogawo ich, gi atel man kuom chuny, gi nyirokene, kaachiel gi boche mogawogi, kod em ma korachwich, ni mar en im mirwakogo jodolo.

²³ Bang’ mano ikaw makati achiel, gi kek achiel moted gi mo, kod chapat achiel, mogol e odheru moting’o makati ma ok ketie thowi man e nyim Ruoth Nyasaye.

²⁴ Ket mago duto e lwet Harun, kendo e lwet yawuote, kendo iyieggi e nyim Ruoth Nyasaye.

²⁵ Eka ikawgi e lwet Harun gi yawuote, kendo iwang’gi e kendo-mar-misango, kaachiel gi misango miwang’o pep, mondo gidum tik mang’ue ng’ar moa kuom misango miwang’o ni Ruoth Nyasaye.

²⁶ “Bang’e ikaw agoko im mane orwakgo Harun, kendo iyiege e nyim Ruoth Nyasaye. En ema nobed lembi kuom chiayono.

²⁷ Ipwodh agoko im mane orwakgo Harun gi yawuote, kiyiege e nyim Ruoth Nyasaye. Em imno moket tenge ni jodolo bende itim kamano.

²⁸ Mago nobed lemo ma Harun gi yawuote yudo kuom jo-Israel, nyaka chieng’. En lemo moket tenge ni jodolo ma jo-Israel golo kuom misengni mag sawo. En mich ma nyaka gichiw ni Ruoth Nyasaye.

²⁹ “Lep Harun mag dolo nyaka dong’ ni yawuote bang’ thone mondo girwak kiwirogi kendo kiketogi e tich dolo.

³⁰ Wuod Harun ma noket kare e tich, kendo ma nobed kadonjo e Hemb Romo mondo oti e Kama Ler nyaka rwakgi kuom ndalo abiriyo.

³¹ “Kaw im morwakgo jodolo, inegi, eka ited ringe kamoro mowal ni Nyasaye,

³² mi Harun gi yawuote nocham ring’ono, kaachiel gi makati modong’, ka gin e dho Hemb Romo.

³³ Ginicham gigo mane opwodhgo richogi kirwakogi kendo kiwalogi. To ng’ato ma ok jadolo kik chamgi nimar gin gik maler.

³⁴ Kapo ni ring’o, kata makati moko odong’ nyaka okinyi, to nyaka wang’gi. Kik chamgi, nimar gin gik maler.

³⁵ “Tim ni Harun gi yawuote mana kaka asechiki. Kamano ketogi e tich nokaw ndalo abiriyo.

³⁶ “Odiechieng’ kodiechieng’ kuom ndalo abiriyo duto, nyaka itim misango mar golo richo gi nyarwath mondo opwodhgo richo. Kamano inipwodh kendo-mar-misango, kitimo misango mar golo richo kuome, kendo iniwire gi mo kiwalego ni tich Nyasaye.

³⁷ Nyaka ipwodh kendo-mar-misango kuom ndalo abiriyo, mondo obed maler moloyo. Gimoro amora mogere kuome nodok mowal ni Ruoth Nyasaye.

Misengni mitimo pile

³⁸ “Gik ma inichiw e kendo-mar-misango gin e magi: Odiechieng’ kodiechieng’ nyaka itim misango gi nyirombe ariyo ma hikgi achiel achiel.

³⁹ Ineg nyarombo achiel gokinyi, to machielo ineg godhiambo.

⁴⁰ Kichiwo nyarombo mokwongo, to nyaka ichiw bende mogo mayom moromo ondweto, moruw gi mo maliw moromo lita ariyo. To bende nyaka ichiw divai moromo lita ariyo, ka misango miolo piny.

⁴¹ To godhiambo ineg nyarombo machielo, kendo ichiwe kaachiel gi misango mar cham kod misango miolo piny, mana kaka nende ichiwo gokinyi, mondo odum tik mamit. En misango miwang’o ni Ruoth Nyasaye.

⁴² Misangono nyaka bed kitimo e dho Hemb Romo e nyim Ruoth Nyasaye kuom tienge duto nyaka chieng’. Kanyo ema an Ruoth Nyasaye nabed karomoe kodu, kendo losoe kodi.

⁴³ Kanyo bende ema naromie gi jo-Israel, kendo duong’na maler nomi kanyono bedo maler.

⁴⁴ Anaguedh Hemb Romo kod kendo-mar-misango obed maler, bende anawal Harun gi yawuote mondo obed jodolona.

⁴⁵ Anadag gi jo-Israel, mi anabed Nyasachgi,

⁴⁶ kendo dakna kodgino nomi ging’e ni an e Ruoth Nyasaye ma Nyasachgi ma nogologi Misri. Adier, an Ruoth Nyasaye an Nyasachgi.