Wuok 27 - MUMA MALER 2015

Kendo-mar-Misango

¹ “Los kendo-mar-misango gi yiend shita. Borne gi lachne mondo obed mita ariyo gi nus.

² Nyaka ilosne tunge ang’wen e kondene mondo gibed gimoro achiel kode, kendo ibawe gi mula.

³ Bende losne agulni mag golo buru kod mo, kaachiel gi rajow gi tewni gi rachwow kod tep mach. Giduto nyaka ilosgi gi mula.

⁴ Losne gimoro mar mula machalo gi sing’enge, kendo ikelne ratege achiel achiel mag mula e kondene ang’wen.

⁵ Kete e bwo ndiri molworo kendo-mar-misango gi yo ka piny, mondo ochop mana e kor kendo-mar-misango.

⁶ Los ni kendono ludhe mag shita, kendo ibawgi gi mula.

⁷ Norwakgi e ratege man e bath kendo koni gi koni, mondo oting’ego.

⁸ Nyaka ilos kendo-mar-misango gi bao, to iye mondo obed thuolo, ka i sanduk. Lose mana kaka ne onyisi ewi got.

Laru mar Hema Maler

⁹ “Los laru ni Hema Maler. Koma odok yo milambo nyaka bed gi pasia mar law katana maber ma borne romo mita piero abich,

¹⁰ mong’aw e sirni piero ariyo, morwak e rachungi piero ariyo mag mula. To rang’aw kod ratege miriwogo sirnigo nyaka bed mag fedha.

¹¹ Kamano koma odok yo nyandwat bende nyaka bed gi pasia ma borne romo mita piero abich, mong’aw e sirni piero ariyo, morwak e rachungi piero ariyo mag mula. Rang’epi kod ratege miriwogo sirni bende nyaka bed mag fedha.

¹² To lach laru modok yo podho chieng’ nyaka bed gi pasia ma borne romo mita piero ariyo gabich, mong’aw e sirni apar, morwak e rachungi apar.

¹³ To lachne koma omanyo yo wuok chieng’, bende borne nyaka rom mita piero ariyo gabich.

¹⁴ E dir rangach koni gi koni nyaka bedie pasia ma borne romo mita abiriyo gi nus.

¹⁵ Pasia ka pasia nyaka ng’aw e sirni adek, morwak e rachungi adek.

¹⁶ To e dhoranga laru iketie pasia mar law katana maber, mogorie maradadi gi usi mambulu gi maralik kod makwar. Pasiano nong’aw e sirni ang’wen morwak e rachungi ang’wen.

¹⁷ Sirni duto molworo laru nyaka bed gi ratege mag fedha, kod rachungi mag mula.

¹⁸ Kamano bor laru biro bedo mita piero abich, to lachne mita piero ariyo gabich, kendo borne modhi malo mita ariyo gi nus. Pasiano nyaka los gi law katana maber, kendo rachungi duto nyaka bed mag mula.

¹⁹ Gik moko duto mibiro tiyogo e Hema Maler, kaachiel gi loyene duto, kod mago mag laru, nyaka los gi mula.

Tich rito Taya

²⁰ “In iwuon nyaka ichik jo-Israel mondo okelni mor zeituni maliw mondo oliel e taya pile.

²¹ Tayano nyaka bed ei Hemb Romo ma Nyasaye romoe gi joge, gi yoka oko mar pasia mogeng’o Sandug Rapar. Harun gi yawuote nyaka rite pile mondo oliel e nyim Ruoth Nyasaye, chakre odhiambo nyaka piny ru. Chikni omako jo-Israel kod nyikwagi nyaka chieng’.