Wuok 26 - MUMA MALER 2015

Hema Maler (Wuok 36.8-38)

¹ “Los Hema Maler gi pasia apar mag law katana maber. Nyaka gor kuomgi kido mar kerubi gi usi mambulu gi maralik kod makwar, ma jatweng’o ma olony ema ogoro.

² Bor pasia ka pasia nyaka bed mita apar gang’wen, to lachne mita ariyo, kendo giduto nyaka gibed maromre.

³ Abich kuomgi noriw kaachiel, kendo abich modong’ bende noriw kamano.

⁴ Nyaka ilos tonde mambulu piero abich e riak pasia matung’ kuom pasia abich mokwongo, kendo tonde piero abich moko e riak pasia matung’ kuom pasia abich modong’.

⁵ Tondego nyaka bed momanyore.

⁶ Bende ilos ramekni piero abich mag dhahabu kendo iriwgo pasia ariyo momanyorego, mondo Hema Maler obed gimoro achiel.

⁷ “Los Hema gi pasia apar gachiel mag yie diek, mondo obed hema ma oko maumo Hema Maler.

⁸ Bor pasia ka pasia nyaka bed mita apar gabich, to lachne mita ariyo. Giduto nyaka gibed maromre.

⁹ Riw pasia abich kaachiel, kendo auchiel modong’ bende iriw kamano. Bang’e ban pasia mar auchiel mondo obed e dho Hema gi malo.

¹⁰ Los tonde piero abich e riak pasia matung’ kuom pasia abich, kendo tonde piero abich moko e riak pasia matung’ kuom pasia auchiel.

¹¹ Bende los ramekni piero abich mag mula, kendo irwakgi e tonde mondo iriwgo hema obed gimoro achiel.

¹² Bath hema modong’ koliero, nyaka geng’ tok Hema Maler.

¹³ Kamano hema maoko biro bedo mabor moloyo pasia maiye gi nus mita koni gi koni, omiyo obiro liero mondo ogeng’ Hema Maler.

¹⁴ To bende los raum mar piende imbe molok gi range makwar mondo oumgo hema maokono, kendo raum machielo molos gi piende monyong’, mondo obed ewi mokwongono.

¹⁵ “Nyaka ilos ni Hema Maler sirni mag yiende shita.

¹⁶ Bor mar siro ka siro nyaka bed mita abich, to lachne nus mita.

¹⁷ Siro ka siro nyaka bed gi tiendene ariyo moriw kaachiel. Sirni duto mag Hema Maler nyaka los machal kamano.

¹⁸ Kiloso sirnigo, to nyaka ilos piero ariyo migerogo sisi mar Hema Maler mochomo yo milambo,

¹⁹ kendo ilos rachungi piero ang’wen mag fedha mirwakoe sirnigo. Rwak tiende ariyo mag siro mokwongo e rachungi ariyo, kendo itim kamano gi sirni duto.

²⁰ Sisi mar Hema Maler mochomo yo nyandwat bende nyaka ilosne sirni piero ariyo,

²¹ kaachiel gi rachungi piero ang’wen mag fedha. Rwak siro ka siro ei rachungi ariyo ariyo.

²² Bende los sirni auchiel ni tok Hema Maler koma odok yo podho chieng’,

²³ kaachiel gi ariyo mamoko mibiro keto e konde ariyo man yo ka tok Hema Maler.

²⁴ Sirni mag kondego nyaka riw gi ratego achiel, chakre ka tiendegi nyaka malo. Sirni ariyogo duto nyaka los machal.

²⁵ Kamano ginibed sirni aboro kod rachungi apar gauchiel mag fedha. Siro ka siro mondo orwak ei rachunge ariyo ariyo.

²⁶ “Los rariw apar gabich gi yiend shita.

²⁷ Rariw abich obed mag sirni mag bath Hema Maler konchiel, kendo abich mamoko obed mag sirni molosgo ka toke, mochomo yo podho chieng’.

²⁸ Rariw ka rariw madiere mondo okadh e kor sirni, koa tung’ konchiel nyaka tung’ komachielo.

²⁹ Nyaka gibaw sirnigo gi dhahabu, kendo iketnigi ratege mag dhahabu mondo omak rariwgo, ma bende nyaka ibaw gi dhahabu.

³⁰ Kamano nyaka ilos Hema Maler, kiluwo mana kido mane onyisi ewi got.

³¹ “Twang’ pasia mar law katana maber. Nyaka jatueng’o molony gor kuome kido mag kerubi gi usi mambulu gi maralik kod makwar.

³² Ng’aw pasiano gi rang’aw mag dhahabu e sirni ang’wen mag yiend shita, mobaw gi dhahabu, kendo morwak ei rachungi ang’wen mag fedha.

³³ Kiseliere e rang’awgo, eka iket Sandug Rapar e toke gi yo ka iye. Kamano pasiano nopog kind Ka Maler kod Kama Ler Moloyo.

³⁴ Bang’e ket raum ewi Sandug Rapar ei Kama Ler Moloyo.

³⁵ Mesa nyaka ket yo nyandwat gi yo ka oko mar pasia, to rachung taya iket momanyore gi mesa, yo milambo mar Hema Maler.

³⁶ Los ni dho Hema pasia mar law katana maber. Nyaka gorie maradadi gi usi mambulu gi maralik kod makwar.

³⁷ Los ni pasiano sirni abich gi yiend shita, mi ibaw gi dhahabu, kendo iketnigi rang’aw mag dhahabu kod rachunge abich mag mula.