Wuok 23 - MUMA MALER 2015

Bura makare kendo madiera

¹ “Kik ijig wach, kendo kik ikony ng’at ma jaketho, kibedo janeno mar miriambo.

² Kik itim gimoro marach mana nikech iluoro koma ji ng’enyie, kata kik iketh bura mana nikech idwaro chwako koma ji ng’enyie.

³ To bende kik idog ni ng’at modhier kayiem.

⁴ “Kineno dher jasiki kata kanje ka ringo lal, to nyaka igeng’e mi idwoke ni wuon-go.

⁵ Ka iyudo kanj ng’at moro ma mon kodi kopodho gi misike, to nyaka ikony wuon-go chunge, kata da bed ni ok idwar konye.

⁶ “Kik uketh buch jachan, kiyale.

⁷ Beduru mabor gi wach mar miriambo, kendo kik umi ng’at maonge ketho ng’adne buch tho, nimar ok nawe ng’at motimo marach machalo kamano.

⁸ Kik ucham asoya nikech asoya mono kata ng’at maber wacho adiera, kendo owito buch ng’at ma onge gi ketho.

⁹ “Kik usand jodak, nikech ung’eyo paro ma jodak nigo, nimar un bende ne un jodak e piny Misri.

Higa mar Sabato, kod chieng’ Sabato

¹⁰ “Unyalo puro lopu kuom higni auchiel, kendo kayo gik monyakie.

¹¹ To e higa mar abiriyo nyaka uwe onindi mak opure, mondo jou modhier ocham gik moloth kuno. To le mae thim nocham gik ma joma odhier oweyo kuno. Puotheu mag mzabibu, gi mag zeituni bende nyaka uwe kamano.

¹² “Unuti kuom ndalo auchiel, to chieng’ mar abiriyo kik uti, mondo dhou gi kenjeu oyue, kendo mondo chuny wasumbu kod chuny jodak oduogi.

¹³ “Mak uru weche duto ma asenyisou. Kik ulam nyiseche mamoko, kendo kik umul nyinggi.

Sewni adek madongo

¹⁴ “Nyaka utimna sawo didek e higa:

¹⁵ Unurit Sap Makati ma ok ketie Thowi kaka nachikou, kuchamo makati ma ok ketie thowi kuom ndalo abiriyo e kinde moketie e due mar Abib, ni mar dueno ema ne uae Misri. Kik ng’ato bi e nyima gi lwete nono.

¹⁶ Kukayo cham mane uchwoyo e lopu, to nyaka utim Sap Keyo, kukelona cham mukwongo kayo. Bende unutim Sap Olembe e giko higa, ka usepono olembe puotheu mag mzabibu kod mag zeituni.

¹⁷ Kinde adekgo e higa, jou machwo duto nyaka bi e nyima an Ruoth Nyasaye.

¹⁸ “E kinde ma utimonae misango gi chiayo, to kik uchiw gimoro moketie thowi, kendo kik uwe bor chiayo motimnago misango dong’ nyaka piny ru mak uwang’o pep.

¹⁹ “Cham mabeyoe moloyo mukwongo kayo, nyaka ukel e Od Ruoth Nyasaye ma Nyasachu. “Kutedo nyadiel, to kik uolie cha min mare.

Malaika mar Ruoth Nyasaye oor mondo otel ni jo-Israel

²⁰ “Koro aoro malaika mondo otelnu e yo, koritou nyaka kuma aseiko.

²¹ Nyaka uwinj wachne, kendo utim kaka owacho. Kik utamru winje, nikech kutamoru kamano, to ok nowenu richo ma kamano, nimar an ema an kode.

²² To ka uwinjo wachne, mutimo duto mawachonu, to anakednu gi wasigu, kendo anathag joma thagou.

²³ Malaikana notel e nyimu, kendo noteru e piny ma jo-Amor gi jo-Hiti gi jo-Perizi gi jo-Hivi kod jo-Jebus odakie, mi anatiek ogendinigo.

²⁴ To kik ukulru ni nyiseche jogo, kata kik ulamgi. Bende kik utim gik ma jogo timo. Nyaka uketh nyisechegi chuth, kendo nyaka umuk sirni maggi ma gilamo.

²⁵ Lamauru, an Ruoth Nyasaye ma Nyasachu, mi anaguedhu gi chiemo kod pi, bende anatiek tuoche duto kuomu.

²⁶ Ong’e dhako ma iye nokirre e pinyu, kendo onge ma nobed migumba. Bende anami udag aming’a.

²⁷ “Anaor kihondko otel nyimu mondo ochand joma dwaro kedo kodu, mi anami wasiku duto ringu.

²⁸ Bende anaor luoro mondo otel nyimu, kendo luoro nogo noriemb jo-Hivi gi jo-Kanaan kod jo-Hiti, mondo owenu thuolo.

²⁹ Ok nariembgi duto e higa achiel, nimar dipo ka piny odong’ nono, molokore thim, kendo ondiegi dinywolre mi thagu.

³⁰ To anariembgi matintin nyaka chop kusemedoru mang’eny moromo kawo pinyno duto.

³¹ Anayar tong’ pinyu, kochakore e Nam Makwar nyak Nam Maduong’ manie tong’ jo-Filistia, kendo kochakore e thim man yo milambo, nyaka aora Yufrate. Anami ulo jopinyno, mi unuriembgi.

³² Kik utim kodgi winjruok kendo kik ulam nyisechegi,

³³ kik uwe gidag e pinyu nimar dipo ka gimiyo uketho e nyima mi ulamo nyisechegi. Mano dilokrenu obadho.”