Wuok 21 - MUMA MALER 2015

Chike mag rito wasumbini

¹ “Chike ma nyaka imi jo-Israel e magi:

² “Ka ng’ato ong’iewo misumba ma ja-Hibrania, to misumbano notine kuom higni auchiel, to e higa mar abiriyo nyaka oweye oa, mak ochulo gimoro.

³ Kane obiro kapok okendo, to enodog kende. To kane obiro kosekendo, to enodog ir chiege.

⁴ To ka ruodhe ema omiye dhako, mi onywologo nyithindo, dhakono gi nyithindogo, nyaka dong’ ni ruodhe, to ng’atno noa kende.

⁵ To kapo ni misumbano ohulo ratiro niya, ‘Ahero ruodha gi chiega kod nyithinda, omiyo ok adwar a’,

⁶ to ruodhe nyaka tere e nyim Nyasaye, kendo e dhoot kata e sis dhoot, mi otuch ite gi riw, kendo ng’atno nobed misumbane nyaka chieng’.

⁷ “Ka ng’ato ong’iewo nyar ng’ato mondo obed misumbane, to ok nowe nyakono oa kaka iweyo wasumbini machwo.

⁸ To ka ok otoyo ruodhe manong’iewe ka dwaro kende, ruodheno nyaka weye mondo ng’ato oware. To ok oyiene mondo ong’iewe ni japiny moro, nikech osewuonde.

⁹ Ka odwaro ni mondo wuode okende, to nyaka osewe kaka dosew nyare owuon.

¹⁰ Ka omedo dhako machielo, to nyaka one ni pod omiyo mokwongono chiemo, gi lewni, kendo onindo e ode.

¹¹ To ka ok otimne gik moko adego, to nyaka oweye oa mak ochulo gimoro.

Chike mag timbe mahundu

¹² “Ngato ka ng’ato mogoyo wadgi monego, en bende nonege.

¹³ To ka obothne, to onyalo ringo mondo odhi oresre kuma abiro nyisou.

¹⁴ To ka ng’ato okiyo wadgi, monego maroyiem, to unugole kata mana e kendona mar misango mondo onege.

¹⁵ “Ng’at mogoyo wuon kata min nyaka negi.

¹⁶ “Ng’at mokwalo dhano nyaka negi, kata da bed ni oyud koseng’iewe, kata koyud ka pod en kode.

¹⁷ “Ng’at mokuong’o wuon kata min nyaka negi.

¹⁸ “Ka ji dhaw, mi ng’ato ogoyo wadgi gi kidi kata gi adhong’, to jal mogono ok otho, to obedo matuo e pien,

¹⁹ kendo bang’e ochango, ma koro onyalo wuotho oko kata mana kosirore gi luth, to jal mane ogoyeno ok nobed gi bura. To nyaka ochul gimoro kuom kinde ma jalo oseketho, kendo nyaka one ni othiedhe, mochango chuth.

²⁰ “Ka ng’ato ogoyo misumbane ma dichwo kata madhako gi luth motho e wago, to nyaka kume.

²¹ To ka misumbaneno obet mangima kuom ndalo achiel kata ariyo, to ok nokume, nikech misumba en mwandu ruodhe.

²² “Ka chwo moko gore, mi moro otuomore kuom dhako ma yach, mi dhakono iye okirore, to tuo moro ok oluwe, ng’at mohinyeno nyaka chul gima chwor dhakono dwaro, ka jong’ad bura oyiego.

²³ E kinde akinda ma ng’ato ohinyo wadgi, to kum nyaka bed maromre gi hinyruok: Ngima kar ngima,

²⁴ wang’ kar wang’, lak kar lak, tielo kar tielo,

²⁵ weng’o kar weng’o, lero kar lero, kendo chwat kar chwat.

²⁶ “Ka ng’ato ogoyo wang’ misumbane ma dichwo kata madhako motucho, to nyaka owe ni misumbaneno thuolo mondo oa, kar chule pesa mar wang’eno.

²⁷ Kata ka ng’ato omuko lak misumbane, to nyaka owene thuolo mondo oa, kar chule lakeno.

Chike momako weg gik moko

²⁸ “Ka rwath ochwowo dichwo kata dhako moro, monego, to nyaka go rwadhno gi kite mi tho, kendo ringre kik cham. To wuon rwadhno ok noyud kum.

²⁹ To ka rwadhno osebedo ka chwowo ji, kendo osesiem wuon-go, to otamore tueye, mi onego ng’ato, to wuon-go bende nyaka negi.

³⁰ To ka buch tho oloki, moketne chudo, to nyaka ochul gimoro amora mowachne, mondo owargo ngimane.

³¹ Ka rwath onego nyathi moro, bed ni en wuowi kata nyako, to chik achielno ema nyaka tigo.

³² To ka rwath onego misumba ma dichwo kata madhako, to wuon rwadh-no nyaka chul ruodh misumbano fedha moromo nus kilo, kendo rwadhno nyaka go gi kite mi tho.

³³ “Ka ng’ato oelo dho bur, moweyo nono, kata ka okunyo bur, to ok oumo dhoge, mi rwath kata faras onyumoree,

³⁴ to nyaka ochul chiayono. Enochul wuon chiayo pesa, to chiayo mothono nodong’ne.

³⁵ “Ka rwadh ng’ato onego rwadh ng’at machielo, to ji ariyogo nyaka lok rwath mangimano pesa, mondo gipogre, kendo ring chiayo mothono bende nyaka gipogre.

³⁶ To ka ong’ere ni rwadhno jachwow ruedhi wetene, to wuon-go nyaka chul rwath kar rwadhno, to chiayo mothono nodong’ne.