Wuok 20 - MUMA MALER 2015

Chike apar

¹ Nyasaye nowuoyo kowacho wechegi:

² “An e Ruoth Nyasaye ma Nyasachu, mane ogolou e piny Misri kuma ne ubedoe wasumbni.

³ “Kik ubed gi Nyasaye moro, to mak mana an.

⁴ “Kik ulos kido moro mopa kata gima chalo gi gimoro manie polo malo, kata manie piny mwalo, kata mana manie pi ma e bwo piny.

⁵ Kik ukulrunigi, kata lamogi kik ulamgi, nikech an Ruoth Nyasaye ma Nyasachu an Nyasaye ma janyiego. Akumo nyithind joma ochaya nikech richo jonywolgi nyaka tieng’ mar adek gi mar ang’wen,

⁶ to tienge gana gi gana mohera kendo momako chikna, to ahero gi hera mosiko.

⁷ “Kik uluong nying Ruoth Nyasaye ma Nyasachu kayiem nono, nimar anakum ng’ato ka ng’ato mokonyore gi nyinga e yo ma ok ni kare.

⁸ “Paruru chieng’ Sabato, kendo uwale ni Ruoth Nyasaye.

⁹ Nyaka uti tijeu duto kuom ndalo auchiel,

¹⁰ to chieng’ mar abiriyo en chieng’ yweyo mowal ni Ruoth Nyasaye ma Nyasachu. Chieng’no, un kaachiel gi yawuotu kod nyiu, kata wasumbu machwo gi mamon, kata jambu, kata mana jodak manie miechu, kik ti tich moro,

¹¹ nimar Ruoth Nyasaye mochweyo polo gi piny kod nam, kaachiel gi gik moko duto manie igi kuom ndalo auchiel, to chieng’ mar abiriyo noyueyo. Mano emomiyo Ruoth Nyasaye noguedho chieng’ Sabato, kowale mondo obed maler.

¹² “Luor wuoru gi meru, eka mondo idag aming’a e piny ma Ruoth Nyasaye ma Nyasachu biro miyou.

¹³ “Kik ineki.

¹⁴ “Kik iterri.

¹⁵ “Kik ikwal.

¹⁶ “Kik ihang ni ng’ato wach.

¹⁷ “Kik igomb od ng’ato, kata chi ng’ato, kata misumba ng’ato, kata dher ng’ato, kata kanj ng’ato, kata gimoro amora ma ng’ato nigo.”

Luoro omako jo-Israel

¹⁸ Kane ji duto oneno ka polo mor kendo mil, bende kane giwinjo ka tung’ ywak, kendo gineno ka got dum iro, ne gikirni, mi gichung’ gi chien.

¹⁹ Ne giwacho ni Musa niya, “In ema mondo iwuo kodwa, to wabiro winjo wachni. To ka Nyasaye ema owuoyo kodwa, to wabiro tho.”

²⁰ Musa nodwokogi niya, “Kik uluor, nimar Nyasaye osebiro mana ni mondo otemu, kendo omi usik kuluore mondo kik utim richo.”

²¹ Ji nochung’ gi chien, to Musa kende ema nosudo machiegni gi bor polo mapek mane Nyasaye nie iye.

Chike mag kende mag misango

²² Ruoth Nysaye nowacho ni Musa niya, “Nyis jo-Israel kama: ‘Koro ung’eyo ni asewuoyo kodu gie polo.

²³ Kik ulos nyiseche mag fedha kata mag dhahabu mondo ulam kaachiel koda.

²⁴ Nyaka ulosna kendo-mar-misango mar lowo, kendo utimie misengni miwang’o pep, kod misengni mag sawo, mutimo gi rombu kod dhou. Kamoro amora ma achiko ni mondo ulamae, to anabie kendo naguedhue.

²⁵ Kapo ni uloso na kendo-mar-misango gi kite, to kik ugere gi kite mopa, nikech kupayogi, to umiyo kendono bedo mogak.

²⁶ Kik ng’ato dhi e kendona-mar-misango koidho raidhi, nimar dipo ka duge oneno.’ ”