Wuok 19 - MUMA MALER 2015

Jo-Israel e got Sinai

¹ E due mar adek kane jo-Israel osewuok Misri, ne gichopo e thim Sinai.

² Ne giwuok Refidim mi gitundo e thim Sinai, kuma ne gibworoe momanyore gi got.

³ Musa noidho godno ir Nyasaye. Mi Ruoth Nyasaye noluonge gie got, mowachone niya, “Nyis nyikwa Jakobo ma jo-Israel kama:

⁴ ‘Nuneno gima natimo ni jo-Misri, kendo kaka nakelou ira, ka ating’ou kaka ongo ting’o nyithinde e bwombe.

⁵ Koro ka unuluora murit singruok ma atimo kodu, to unubed joga awuon, ma aseyiero kuom ogendini duto; nikech piny duto en mara.

⁶ Unubed oganda mowal, matiyona ka jodolo.’ Mano e wach ma onego inyis jo-Israel.”

⁷ Omiyo Musa nodhi, mochoko jotend jo-Israel kanyakla, monyisogi weche duto mane Ruoth Nyasaye osewachone.

⁸ Ji duto nodwoke rat niya, “Wayie timo gik moko duto ma Ruoth Nyasaye osewacho.” Mi Musa nodwoko ni Ruoth Nyasaye wach mane ji owacho.

⁹ Eka Ruoth Nyasaye nowacho ni Musa niya, “Abiro biro iri ka an ei bor polo mapek, mondo awuo kodi ka ji winjo, mondo gen ma gigenigo kik rum.” Musa nonyiso Ruoth Nyasaye gima ji nodwoko.

¹⁰ Ruoth Nyasaye nowacho ni Musa niya, “Dhiyo, ipwodh ji kawuono gi kiny kendo inyisgi gilwok lepgi.

¹¹ To orucha nyaka gibed moikore, nikech odiechieng’no ema an Ruoth Nyasaye, nalor ewi got Sinai, kama ji duto nonenae.

¹² Nyaka iket tong’ molworo got, kendo iwach ni ji niya, ‘Neuru ni ok uidho got, kata mana nyono tike. Ka ng’ato omulo got, to nyaka nege.

¹³ To ka unege, kik umule gi lwetu, to goyeuru mana gi kite kata chieleuru mana gi asere. Timuru kamano ni dhano kata ni le. To mak mana ka tung’ oywak eka ji nyalo dhi e got.’ ”

¹⁴ Musa nolor oa e got, moduogo ir ji. Nopwodhogi, kendo ne gilwoko lepgi.

¹⁵ Nowachonigi niya, “Ikreuru, kendo kik uriwru gi mon, mondo orucha oyud ka usepwodhoru.”

¹⁶ Chieng’ mar adek, kane piny oru, polo ne mor kendo mil ewi got, bende ne nitie bor polo mapek, kendo tung’ ma ywak, mi ji duto mane nie kambi nokirni.

¹⁷ Musa notelo ni ji ka gia e kambi gidhi romo gi Nyasaye, mi ne gichung’ e tiend got Sinai.

¹⁸ Wi got duto notimo iro, nikech Ruoth Nyasaye noselorie, ka en ei mach. Iro ne dhuolore, kendo ji duto ne kirni malich.

¹⁹ Ywak tung’ nomedore kendo e kinde ka kinde mane Musa wuoyo, Nyasaye ne dwoke gi mor polo.

²⁰ Ruoth Nyasaye nolor, mochung’ ewi got Sinai, kendo noluongo Musa kanyo, mi Musa noidho modhi ire.

²¹ Nowacho ni Musa niya, “Lor idhi isiem ji dipo ka gikadho tong’ mondo gibi ginena, nono to gibiro tho mang’eny.

²² Kata mana jodolo bende, moyienigi chopo ira, nyaka ne ni opwodhore, nono to abiro mwomora kuomgi.”

²³ To Musa nodwoko Ruoth Nyasaye ni, “Ji ok nyal biro ewi got Sinai ku, nikech in iwuon ema nisiemowa matek, kichikowa ni mondo waket tong’ ni got mondo wawalego, osik maler.”

²⁴ Ruoth Nysaye nowachone niya, “Lor mondo idhi iom Harun. To jodolo kaachiel gi ji kik kadh tong’ ka giidho ira, nono to abiro mwomora kuomgi.”

²⁵ Omiyo Musa nodhi ir ji, mowuoyo kodgi.