Wuok 18 - MUMA MALER 2015

Jethro obiro limo Musa

¹ Jethro jadolo mar Midian, kendo jaduong’ Musa, nowinjo gik moko duto mane Nyasaye osetimo ni Musa gi jo-Israel, kendo kaka Ruoth Nyasaye nogologi Misri.

² Kane Musa oriembo Zipora chiege, Jethro nokawo nyareno

³ kaachiel gi yawuote ariyo, ma Gershom gi Eliezer. Musa nosewacho niya, “An jadak e piny ma ok marwa,” omiyo nochako wuode achiel ni Gershom, (tiende ni, jadak).

⁴ Bende nosewacho niya, “Nyasach wuora en jakonyna mane oresa ka Farao dwaro nega.” Omiyo nochako wuode machielo ni Eliezer, (tiende ni, Nyasaye en Jakonyna).

⁵ Jethro nobiro ir Musa e god Nyasaye, kuma ne Musa obworoe, kokelone chiege gi yawuote.

⁶ Noter ne Musa wach ni, “Jaduong’ni Jethro biro iri gi chiegi kod yawuoti.”

⁷ Musa nowuok, modhi romone. Nokulorene, kendo onyodhe, mi gimosore. Kane gisedonjo e hema,

⁸ Musa nonyise duto mane Ruoth Nyasaye osetimo ni Farao, kendo ni jo-Misri, nikech nohero jo-Israel. Bende nonyise thagruok mane giyudo e yo, kendo kaka Ruoth Nyasaye noresogi.

⁹ Jethro koro ne mor ahinya kowinjo ng’wono mane Ruoth Nyasaye otimo ni jo-Israel koresogi kuom jo-Misri.

¹⁰ Nowacho niya, “Opak Ruoth Nyasaye mane oresou e lwet jo-Misri, kendo e lwet Farao.

¹¹ Koro ang’eyo ni Ruoth Nyasaye duong’ moloyo nyiseche duto, nikech osereso jo-Israel e loch mar jo-Misri, kuma ne iritogie gi achaye.”

¹² Bang’e Jethro notimo ni Nyasaye misango miwang’o pep, kod misengni mamoko. Harun gi jodong Isarel duto ne jobiro mochamo sawono gi Jethro e nyim Nyasaye.

Yiero mar jong’ad bura

¹³ Kinyne Musa nobet piny mondo oyal ji, mi ji nochung’ kolwore, chakre okinyi nyaka odhiambo.

¹⁴ Kane Jethro oneno tich mang’eny mane Musa timo ni ji, nopenje niya, “Ang’o momiyo itiyo tijegi ni jogi duto, ka in kendi, ka ji ochung’ kolwori chakre okinyi nyaka odhiambo?”

¹⁵ Musa nodwoke niya, “Nyaka atim kamano, nikech ji biro ira mondo ong’e gima Nyasaye dwaro.

¹⁶ Ka ng’ato odonjo ni wadgi, to gikelo wachno ira mondo ang’ad buchgi. To bende anyiso ji buche gi chike mag Nyasaye.”

¹⁷ Jethro nowachone niya, “Gima itimoni ok ber.

¹⁸ Ibiro mana ol, kaachiel gi jogi duto. Tijni ng’eny, omiyo ok inyal time kendi.

¹⁹ We ang’adni rieko, mondo Nyasaye okonyi. In onego ibed jachung’ ni ji e nyim Nyasaye, kiterone ywakgi.

²⁰ Bende onego ipuonjgi chike kod buche, kendo inyisgi yore monego giluw, kod gik monego gitim.

²¹ To nyaka iyier ji mariek kendo moluoro Nyasaye kuom ji duto. Nyaka gibed joadiera, kendo ma ok nyal chamo asoya. Gin ema mondo iketgi jotend ji. Jomoko kuomgi onego rit ji alufu achiel achiel, to moko ji mia mia, kendo moko ji piero abich abich, to moko ji apar apar.

²² Jogi ema mondo ong’ad ni ji bura pile. Buche matek kende ema ginyalo kelo iri, to moko matindo to ging’ad kendgi. Kipogo ting’ kodgi kamano, to tiji biro dong’ moromi.

²³ Kitimo gima awachoni, to Nyasaye biro konyi, mi ok ibi ol, kendo ji duto nyalo dok miechgi piyo, ka buchegi oserumo.”

²⁴ Musa nowinjo wach jaduong’ne, motimo kaka nowachone.

²⁵ Noyiero joma riek kuom jo-Israel duto, moketogi jotelo mag ji alufu achiel achiel, gi mag ji mia mia, gi mag ji piero abich abich, kod mag ji apar apar.

²⁶ Jotelogo ne ng’ado bura ni ji kinde duto. Buche matek kende ema ne gitero ir Musa, to mago matindo ne ging’ado kendgi giwegi.

²⁷ Bang’e Musa noweyo jaduong’ne oa, modok thurgi.