Wuok 17 - MUMA MALER 2015

Pi owuok e lwanda

¹ Oganda duto mar jo-Israel nowuok e thim Sin, mi giwuotho matintin kaka Ruoth Nyasaye ne chikogi. Ne gibworo Refidim, to pi modho ne onge kuno.

² Mano nomiyo ji odhaw gi Musa, ka giwachone niya, “Miwa pi wamodhi!” Musa nodwokogi ni, “Marang’o udhaw koda? Ang’o momiyo utemo Ruoth Nyasaye?”

³ To ji ne riyo oloyo malich, omiyo ne giywakne, ka giwacho niya, “Ere gimomiyo nigolowa Misri gi nyithindwa kod jambwa mondo riyo obi onegwa?”

⁴ Kane Musa owinjo kamano nokwayo Ruoth Nyasaye gi chunye duto, kopenjo niya, “Abiro timo ang’o gi jogi, nimar gichiegni goya gi kite?”

⁵ Ruoth Nyasaye nodwoke niya, “Kaw jodong Israel moko mondo itelgo e nyim ji, kiting’o ludhi mane ichwadogo aora Nael.

⁶ Anachung’ e nyimi kanyo, but lwanda man Horeb. Inichwad lwandano, mi pi nowuogie mondo ji omodhi.” Musa notimo kamano e nyim jodong Israel.

⁷ Nochako nying kanyo ni Masa, (tiende ni, tem), to bende nochake ni Meriba, (ma tiende ni, dhaw), nikech jo-Israel nodhaw kode kanyo, kendo otemoe Ruoth Nyasaye, ka gipenjo niya, “Ruoth Nyasaye ni koda, koso oonge?”

Jo-Israel okedo gi jo-Amalek

⁸ Jo-Amalek nobiro Refidim, momonjo jo-Israel.

⁹ Mi Musa nowacho ni Joshua niya, “Yier jomoko mondo kiny udhi ukednwago gi jo-Amalek. An to abiro chung’ ewi got kating’o luth mane Nyasaye omiya.”

¹⁰ Joshua notimo kaka Musa nochike, mi nokedo gi jo-Amalek, to Musa gi Harun kod Hur ne joidho ewi got.

¹¹ E kinde duto mane Musa oting’o bedene malo, jo-Israel ne loyo, to kane odwoko bedene piny, to jo-Amalek ema ne loyo.

¹² Kane bede Musa koro ojony, Harun gi Hur ne joketone kidi mobetie, ka giting’o bedene koni gi koni malo. Ne gisiro bedene kamano nyaka chieng’ opodho,

¹³ mi Joshua noloyo jo-Amalek monegogi.

¹⁴ Bang’e Ruoth Nyasaye nowacho ni Musa niya, “Ndik gima osetimoreno e kitabu mondo e ndalo mabiro ji opar wachno. Bende inyis Joshua ni abiro miyo wi ji duto wil chuth gi jo-Amalek.”

¹⁵ Musa nogero kendo-mar-misango, mi nochake ni Jehova-Nisi, (tiende ni, Ruoth Nyasaye e bandecha.)

¹⁶ Eka nowacho niya, “Akuong’ora e bwo bandech Ruoth Nyasaye, ni Ruoth Nyasaye biro kedo gi jo-Amalek nyaka chieng’.”