Wuok 16 - MUMA MALER 2015

Nyasaye ochiwo Muma

¹ Oganda duto mar jo-Israel noa Elim, mi ochopo e thim Sin manie kind Elim gi Sinai. Mano notimore due mar ariyo kane gisea Misri.

² Jo-Israel duto noywak ni Musa gi Harun,

³ ka giwacho niya, “Mad ne Ruoth Nyasaye negwa e piny Misri, kuma ne wanyalo betie piny gi tap ring’o e nyimwa, mwachiem mana kaka wadwaro. To koro usekelowa e thimni mondo kech onegwa waduto!”

⁴ Ruoth Nyasaye nowacho ni Musa niya, “Abiro loronu chiemo koa e polo. Odiechieng’ kodiechieng’ ji nyaka dhi mondo ochok chiemo moromo chamo odiechieng’no. Kamano abiro temogi mondo ane ane ka giyie chikena.

⁵ To chieng’ mar auchiel, ka gitedo gima gisechoko, to giniyud ni oromre diriyo gi mago michoko pile e odiechieng’ achiel.”

⁶ Omiyo Musa kod Harun nowacho ni jo-Israel duto niya, “Godhiamboni ubiro ng’eyo ni adier Ruoth Nyasaye ema nogolou Misri,

⁷ kendo kinyne gokinyi unune duong’ne maler, nimar osewinjo kaka uywakne. Wan ok ema uywagnwa, nikech wan ok wan gimoro.”

⁸ Eka Musa nomedo wacho niya, “Ruoth Nyasaye ema biro miyou kuon mang’eny mondo ucham gokinyi, nimar osewinjo kaka uywakne. Wan ok uywagnwa, to Ruoth Nyasaye ema uywakne, nikech wan ok wan gimoro.”

⁹ Musa nowachoni Harun niya, “Nyis ji duto mondo ochung’ e nyim Ruoth Nyasaye, nimar osewinjo ywakgi.”

¹⁰ Kane Harun pod wuoyo gi jo-Israel, ne ging’iyo yo ka thim, kendo ne gipo ka duong’ maler mar Ruoth Nyasaye othinyore e bor polo.

¹¹ Ruoth Nyasaye nowacho ni Musa niya,

¹² “Asewinjo ywak jo-Israel, omiyo koro nyisgi kama: ‘Kapok piny oyuso, ubiro yudo ring’o mondo ucham, to gokinyi ubiro yudo kuon mang’eny. Eka unung’e ni an Nyasaye ma Nyasachu.’ ”

¹³ Godhiambono aluru mang’eny nobiro moimo kama ne gibworoe, kendo gokinyi tho nomoko, molworo kambi duto.

¹⁴ To kane tho orumo, gik moko matindotindo, mong’inore machalo gi tho, nodong’ e thim.

¹⁵ Jo-Israel nonenogo, to ne ok ging’eyo ni en ang’o, omiyo ne gipenjore kendgi giwegi ni, “Mano to ang’o?” Musa nodwokogi niya, “Mano e kuon ma Ruoth Nyasaye osemiyou mondo ucham.

¹⁶ Ruoth Nyasaye osechiko ni mondo ng’ato ka ng’ato kuomu ochok morome, ka kwanyo ondweto achiel ni ng’ato ka ng’ato manie hembe.”

¹⁷ Jo-Israel notimo kamano. Jomoko kuomgi nochoko mang’eny, to jomoko nochoko manok.

¹⁸ To kane gipimogi e ondweto, ne giyudo ni joma nochoko mang’eny ne ok nigi mathoth mohingogi, bende joma nochoko manok ne ok nigi matin moremogi to ng’ato ka ng’ato nosechoko mana morome.

¹⁹ Musa nowachonigi niya, “Kik ukan chiemo moko nyaka kiny.”

²⁰ Jomoko kuomgi ne ok odewo wach Musa, to nokano chiemo moko nyaka kinyne, mi kudni nopong’o chiemogo, moketho. Omiyo Musa nokecho kodgi.

²¹ Okinyi kokinyi, ng’ato ka ng’ato ne choko chiemo morome chamo. To ka chieng’ oseowore, chiemono ne leny rumo.

²² Chieng’ mar auchiel ne gichoko chiemo moromo chamo diriyo. Ng’ato ka ng’ato nochoko onduetni ariyo. Jodongo duto mag oganda nobiro, monyiso Musa wachno,

²³ mi nodwokogi niya, “Ruoth Nyasaye osechiko kama: ‘Kiny en chieng’ yueyo ma en Sabato mowal ni Ruoth Nyasaye. Kuom chiemo musechokogo, unyalo bulo mago mudwaro bulo, kendo boko mago mudwaro boko. To modong’ mondo oket tenge, okan nyaka kiny.’ ”

²⁴ Ne gitimo kaka Musa nochiko, mi ne gikano gima odong’ nyaka kinyne, kendo ne ok okethore, bende kudni ne ok odonjoe.

²⁵ Musa nowachonigi niya, “Mano ema mondo ucham tinende, nikech kawuono en chieng’ Sabato. Tiende ni chieng’ mowal ni Ruoth Nyasaye. Omiyo ok ubi yudo chiemo oko mukwanyo.

²⁶ Unyalo choko chiemo kuom ndalo auchiel, to chieng’ mar abiriyo, ma en chieng’ Sabato, chiemono ok bi lwar.”

²⁷ To chieng’ mar abiriyonogo, jomoko nodhi mondo ochok chiemo, to ne ok giyudo.

²⁸ Eka Ruoth Nyasaye nowacho ni Musa niya, “Ubiro tamoru rito chikena gi buchena nyaka karang’o?

²⁹ Ng’euru ni an Ruoth Nyasaye ema aseketonu chieng’ Sabato. Kuom mano, chieng’ mar auchiel amiyou chiemo moromo ndalo ariyo. To chieng’ mar abiriyo, ng’ato ka ng’ato nyaka bed mana kama entie, kendo kik owuog e dalane.”

³⁰ Kamano ji noyueyo chieng’ mar abiriyo.

³¹ Jo-Israel nochako chiemono ni, ‘Manna’. Nochalo gi kodhi matindotindo marachere, kendo nomit ka kek moted gi mor kich.

³² Musa nowacho niya, “Ruoth Nyasaye ochiko kama: ‘Kawuru manna moromo ondweto achiel, ukan ni nyikwau, mondo chieng’ moro gine chiemo mane amiyou mondo ucham e thim, kane agolou Misri.’ ”

³³ Eka Musa nowacho ni Harun niya, “Kaw agulu, iolie manna moromo ondweto achiel, kendo iket e nyim Ruoth Nyasaye mondo okan ni nyikwawa.”

³⁴ Omiyo Harun nokawe, mokete e nyim Sandug Muma, mondo okane kaka Ruoth Nyasaye nochiko Musa.

³⁵ Jo-Israel nochamo manna kuom higni piero ang’wen, nyaka ne gichopo e piny mane ginyalo dakie. Ne gichamo mannano kamano nyaka ne gichopo e mbap piny Kanaan. (

³⁶ Onduetni ang’wen romre gi debe achiel).