Wuok 11 - MUMA MALER 2015

Musa okoro tho nyithindo makayo

¹ Ruoth Nyasaye nowacho ni Musa niya, “Koro odong’ masira achiel ma abiro kelo ni Farao gi jo-Misri. Eka noweu udhi. To ok mano kende, to noriembu mana kaka ng’at ma riembo chiege.

² Koro nyis ji ni ng’ato ka ng’ato ma dichwo kata ma dhako mondo okwa gik molos gi fedha kod dhahabu kuom jogweng’gi.”

³ Mi Ruoth Nyasaye nomiyo jo-Misri ogeno jo-Israel. To bende jodong Farao gi jo-Misri duto nomiyo Musa duong’ ahinya.

⁴ Musa nowacho ni Farao niya, “Ruoth Nyasaye owacho kama: ‘Abiro wuotho kuom jo-Misri e dier otieno tir,

⁵ kendo nyithindo makayo duto manie piny Misri biro tho, chakre kach ruoth Farao nyaka kach dhako ma misumba ma jarego, kaachiel gi kach jamni duto.

⁶ Ywak maduong’ ma pok one, bende ma ok none, biro bedo e piny Misri.

⁷ To jo-Israel biro bedo gi kue, ma kata mana guok ok nogue dhano kata chiayo.’ Kamano unung’e ni Ruoth Nyasaye oketo pogruok e kind jo-Misri gi jo-Israel.

⁸ Bang’e jodongi nobi ira, mi ginikulrena ka giwacho niya, ‘Dhiyo, un gi jou duto!’ Bang’ mano eka naa.” Mi Musa noa ir Farao gi mirima mager.

⁹ Ruoth Nyasaye nowacho ni Musa niya, “Farao ok bi winjo wachni. Omiyo abiro medo timo honni e piny Misri.”

¹⁰ Musa gi Harun nosetimo honnigo duto e nyim Farao, to Ruoth Nyasaye nomiyo wiye odoko matek, mi ne ok onyal weyo jo-Israel a e pinye.