Wer Mamit 8 - MUMA MALER 2015

¹ Mad da bed ni in owadwa mane wadhodhogo thuno achiel, to da anyodhi kata mana e wang’yo ka aromo kodi! Kata bed ni ng’ama nadi ema rangowa, bende onge ng’ama da onyierowa.

² Da ateri e od mama, mi amiyi divai mamit.

³ Badi ma koracham oteno wiya, to badi ma korachwich okwaka.”

Wuowi:

⁴ “Un nyi Jerusalem, kuong’renauru ni ok unuchoch herawa.”

Wer mar auchiel Nyiri:

⁵ “Mano ng’a, mawuok e thim, ka jokwakore gi jaheraneno?” “Jaherana, ne achiewi e bwo yadh olemo, kama ne meru onywolie.

Nyako:

⁶ Kik iher ng’ato nono mak mana an. Adier, kik ikwak nyako moro nono mak mana an. Hera nigi teko mana ka tho. Chutho, hera matut tek mana ka tho hie. Omuoch mach, kendo oliel mana ka mach mang’ang’ni,

⁷ ma kata pi mathoth manade ok nyal nego. Adier, kata ohula maduong’ manade ok nyal yuoye. To ka ng’ato otemo ni ng’iewo hera, kata mana gi mwandune duto, to achaye kende ema oyudo.”

Nyiri:

⁸ “Wan gi nyaminwa moro matin, ma thunde pok ochwopo. Koro wabiro time nadi, ka wuowi obiro dware?

⁹ Da bed ni en ohinga, to da wageng’e gi osuri mar fedha, kendo ka da bed ni en dhorangach, to da wageng’e gi bepe mag sida.”

Nyako:

¹⁰ “An to an ohinga, kendo thunda ema orita. Jaherana ong’eyo ni aritora maber, maonge gima dithage.”

Wuowi:

¹¹ Solomon nigi puoth mzabibu, kama iluongo ni Baal-Hermon. Oketo puodhono e lwet jopur, kendo moro ka moro nyaka chule fedha alufu achiel kuom olembene.

¹² An to an gi puotha awuon mar mzabibu. Emomiyo Solomon, in to bed abeda gi fedha miyudo kuom jopur! Jopur bende mondo obed abeda gi pokgi mar fedha mia ariyo ma giyudo!

¹³ “A jaherana, jowadwa ochiko itgi, omiyo yie awinjie dwondi gie puodho kuno.”

Nyako:

¹⁴ “Reti, ibi ira jaherana, mondo ibed e gode mang’ue ng’ar, mana ka gima in apol, kata ngau ma pod dongo modak e gode.”