Wer Mamit 6 - MUMA MALER 2015

Nyiri:

¹ “Ere kuma jaherani nogo odhiye, yaye, nyako majaber moloyo nyiri duto gi ber? Ochiko kure, mondo wakonyi manye?”

Nyako:

² “Jaherana osedhi e puothe, kama gik mang’ue ng’ar dongoe, mondo okwa kanyo kendo opon ondanyo.

³ Jaherana en mara, kendo an bende an mare. Okwayo e chuny ondanyo.”

Wer mar abich Wuowi:

⁴ “Jaherana, iber mana ka Jerusalem, kata ka dala mar Tirza. Ka aneni, to agamo yueyo agama, mana ka gima aneno mier ariyogo.

⁵ Gol wang’i kuoma nimar wang’i nega. Yie wiyi miel mana ka kwedh diek, machikore ka lor e gode mag Gilead.

⁶ Lekeni tar mana ka rombe ma olwok kawuono. Moro ka moro omanyore gi wadgi, kendo onge kata achiel momukore.

⁷ Lembi miumo gi nanga kwar ka olemo.”

⁸ Ruoth nigi mon piero auchiel, gi mamoko piero aboro, kaachiel gi nyiri mokadho akwana.

⁹ To an ahero mana nyako achiel kende, ma jaber ka winyo. En e nyar min kende, ma min ohero malich. Nyiri duto ka onene, to pake. Kata mana mond ruoth bende pake gi wer.

¹⁰ Ma to ng’a, ma pilore ka wang’chieng’ni? Adier, ojaber mana ka due, kendo ong’ang’ni mana ka wang’chieng’! Ka anene to agamo yueyo agama mana kaka agamo yueyo kaneno gik pologo.

¹¹ Ne alor mwalo e puoth nas, mondo ane kaka odundu loth e dho aora, kendo ane kaka yiend mzabibu moyo, kata ka yien mamoko ochako thiewo.

¹² Koro amor mokadho. Achalo jatend oganda lweny moidho gache.

Nyiri:

¹³ “Nyar Shulam, duogi! Yaye duogi. Yie iduogi mondo waneni.”

Wuowi:

¹⁴ “Ere gima omiyo udwaro neno nyar Shulam, ka mielo miel machon?