Tobit 2 - MUMA MALER 2015

Tobit olokore muofu

¹ Kuom mano, nadok dala e ndalo loch Esarhadon, kendo nodwokna Ana chiega kod Tobias wuoda. Ne watimo Sap jo-Yahudi mar Pentekost, miluongo bend ni Sap Jumbe, kendo nolos chiemo mang’eny.

² Nabet piny mondo achiem, kendo nolos mesa mi oketie chiemo mopogore opogore e nyima. Eka nawacho ni Tobias Wuoda niya, “Nyathina, dhiyo kuom owetewa manie tuech Nineve kaeri, idwar ng’ato modhier kendo ma ohero Nyasaye gi chunye duto mondo ikel ka, ochiem kodwa. Abiro riti nyaka iduogi, nyathina.”

³ Omiyo Tobias nowuok modhi dwaro ng’at moro modhier kuom owetewa. To kane odwogo, nowachona niya, “Wuora!” Nadwoke ni, “En ang’o, nyathina?” Eka nomedo wachona ni, “Wuora, anwang’o ka jomoko odeyo jaogandawa moro, monego, kendo giwito ringre e chiro, kendo pod en kuno kata mana sani.”

⁴ Kane awinjo kamano, nachung’ piyopiyo mi aweyo chiemo kapok abilo. Eka ne adhi maomo ringre ng’atno, mi akelo e oda, karito mondo piny oyusi, eka ayike.

⁵ Bang’ mano nalwokora, kendo ne achiemo ka akuyo

⁶ kendo ka pi wang’a chuer. Naparo weche mane Amos janabi owacho kuom Bethel niya, “Sewni mau nolokre ywak mar tho, kendo wendeu mag mor nolokre dengo.”

⁷ To kane piny oseyuso, nadhi makunyo bur, ayikoe ng’atno.

⁸ Joma odak buta nojara, kawacho ni, “Neyeuru, tinde ok oluor kata matin! Ne oringo olal nikech ne osebedo koyiko ji mana kama, to koro eri oyiko ji kendo!” Ne giwacho kamano nikech jatend Asuria yande ne oseketo pesa ma inyalo mi ng’ama onega, nikech yik mane ayikogo jowetena.

⁹ Kane aselwokora otieno, nadhi e laru mi anindo but ohinga molworo laru. Piny ne liet ahinya, omiyo ne ok aumo wiya.

¹⁰ To ne ok ang’eyo ni winy nie wi ohingano malo, kama ochikor gi wiya. Winygo nopielo chieth maliet e wengena, mi wengena kuonde moko notimo kidayi kidayi marachere. Ne adhi kuom jothieth mondo othiedhna kuondego, to kaka ne gimedo olo yath e wengena, e kaka kuonde maracherego nomedo mana loka muofu, mi achien nadoko muofu chuth. Nabedo muofu ka ok anen kuom higni ang’wen, kendo wachno nochando chuny owetena ahinya. To Ahikar nokonya ka rita maber ahinya kuom higni ariyo, nyaka nowuok modhi Elimais.

¹¹ E kindeno duto, Ana chiega ne tiyo tich mon.

¹² E kinde ka kinde mane oselosoe gimoro ma ng’ato dwaro, notero gino ni ng’atno, eka oyudo chudo. Kamano due abiriyo due mar adek, ne otieko loso gimoro, mi otero ni joma ne dwaro gino. Jogo nochule nengo gino duto, to bende ne gimedo nyadiel mondo odhi ocham.

¹³ To kane Ana ochopo dala, nyadiendno nochako ywak. Kuom mano, naluongo Ana mi apenje ni, “Chiayoni oa kanye? Koso dipo ka en gima okwal Dwoke piyo ni wegi, nikech ok wanyal chamo gima okwal.”

¹⁴ Ana nodwoka ni, “Ooyo, ne ongesago ewi chudo mane ayudo kuom gima ne aloso.” To kata kamano ne ok ayie kode, omiyo namedo wachone ni mondo odwoke kuma ne ogolee. To wachno nokwodo wiya e nyime kanyo. En to nodwoka niya, “To in, kony ma isekonyogo joma odhier kod timbeni mag ng’wono osekonyi nang’o?”