Tobit 1 - MUMA MALER 2015

¹ Ma e wach man kuom Tobit, wuod Tobiel, wuod Ananiel, wuod Aduel, wuod Gabael, ma nyakwar Asiel, jadhood Naftali.

² E ndalo loch Shalmanezer ruodh Asuria, ne odar Tobit mogol Thisbe mi oter Asuria. Thisbe ne dala man yo milambo mar Kedesh-Naftali e piny Galili Mamalo, tok Hazor yo podho chieng’, kendo yo nyandwat mar Shefat.

Ngima Tobit e piny Asuria

³ An Tobit asewuotho e yore mag adiera, kendo asebedo katimo timbe mabeyo e ndalo duto mag ngimana. Nakonyo owetena gi jowa mane odarwago moterwa e piny Nineve e piny Asuria, ka amiyogi gik mang’eny.

⁴ Kane pod adak thurwa e piny Israel, kapod an rawera, dhood kwarwa Naftali nopogore gi dhood Daudi kendo gi Jerusalem, kata obedo ni Jerusalem kende e dala mane Nyasaye oyiero mondo dhoudi duto mag Israel otimie misengni. Hekalu, ma en kar dak mar Nyasaye, ne oger e dalano, mi opwodhe mondo obedie nyaka chieng’.

⁵ Owetena duto gi jodhood Naftali duto to ne timo lisweche ni nyaroya mane Jeroboam ruodh Israel oloso, moketo e dala mar Dan e piny gode mag Galili.

⁶ Kuom ndalo mang’eny, an kenda ema ne adhi Jerusalem mondo alem, ka aluwo chike moket ni jo-Israel duto nyaka chieng’. Ne atero chamb gwel, gi jamni mokwong nywol, gi achiel kuom apar mag jamni kod mag rombe mohang busi.

⁷ Gigo duto ne amiyo jodolo ma yawuot Harun mondo otimgo misengni e kendo-mar-misango. Jo-lawi mane tiyo Jerusalem to ne amiyo achiel kuom apar mag divai gi mag ngano mag olemb zeituni kod mag olemo mamoko. Bende kuom higni auchiel moluore, ne achako akawo achiel kuom apar machielo mag giga, mi aloko pesa, atero Jerusalem

⁸ kendo apogo ni nyithi kiye gi mond liete kod jopinje mamoko mane odak e kind jo-Israel. Ne amiyogi gigo kamano kaka chiwo bang’ higni adek adek. To bende kane wachiemo, to ne waluwo puonj Debora min Ananiel kwarwa nikech noyudo wuora osetho moweya kich.

⁹ To kane asedoko ng’ama duong’, ne akendo nyako moro ma nyar dhoodwa ma nyinge Ana. Ne onywolona nyathi ma wuowi, mi achako ni Tobias.

¹⁰ Koro kane odar jo-Israel moter e piny Asuria, an bende ne otera Nineve.

¹¹ Owetewa gi jowa ne chamo chiemb joma ok jo-Yahudi kuno. An ne asiko ka ayie kuom Nyasaye gi chunya duto to ne adagi chamo chiembgigo,

¹² nikech ne asiko ka ayie kuom Nyasacha gi chunya duto.

¹³ Kuom mano, Nyasaye Manyalo Gik Moko Duto nomiyo ruoth Shalmanezer oyie koda, moketa jang’iew gige.

¹⁴ E ndalo duto mane ongima ne adhi e piny Media kinde ka kinde mondo aloknee ohala, kendo ne akano gunde mag fedha moromo kilo mia adek kuom Gabael owadgi Gabrias, e dala mar Rages, e piny Media kuno.

¹⁵ To kane Shalmanezer otho, mi Sena karib wuode odoko ruoth kare, yore madhi Media nodin, mi ne ok anyal chako dhi kuno kendo.

¹⁶ To e ndalo loch Shalmanezer, ne asebet ka akonyo jothurwa, ka atimonigi gik moko kinde ka kinde.

¹⁷ Joma kech kayo ne amiyo chiemba, kendo joma ne ni duge ne amiyo nengni mondo orwaki. To ringre jowa mane oyudo kobol e tok ohinga mar Nineve, bende ne akawo kendo ayiko.

¹⁸ To bende kane ruoth Senakarib onego jo-Israel mang’eny ahinya, ka en gi mirima mager, nakawo ringre jogo, mi ayiko. Mano notimore e kinde mane Ruodh Polo osekumoe Senakarib kuom ayany mane oyanyego, mi oringo oa Judea ka jolwenje oke koni gi koni. To ringre jogo nasekawo mana ling’ling’ mi ayiko, omiyo kane Senakarib manyogi to ne ok onyal yudogi.

¹⁹ To ja-Nineve moro nodhi ir ruoth, monyise ni an ema nayiko jogo ling’ling’, kendo kane afwenyo ni ruoth osewinjo wachno, nang’eyo ni ibiro dwara mondo onega, omiyo luoro nomaka maringo.

²⁰ To ne gikawo giga duto mi giloko mwandu Serikal. Onge gima ne odong’na, mak mana Ana chiega kod Tobias wuoda.

²¹ Kane pok ndalo piero ang’wen okadho, yawuot ruoth Senakarib ariyo nonege, mi giringo gidhi e gode mag Ararat. Esarhadon wuode nodoko ruoth kare, kendo Ahikar wuod Anael owadwa nodoko jarit pesa kendo jalos weche madongo mag pinyno.

²² Eka Ahikar nokedona, mi ruoth Esarhadon noyiena mondo adog Nineve. E ndalo Senakarib ruodh, Asuria, Ahikar ne jaduong’ jogam ni ruoth divai, kendo jarit tere ma ruoth ma ruoth goyogo sei, bende ne en jalos weche mag piny kendo jarit pesa. Esarhadon bende noweye mana e tijenego. Ahikar ne en watna ma wuod owadwa.