Tim jo-Lawi 9 - MUMA MALER 2015

Harun otimo misengni

¹ Chieng’ mar aboro Musa noluongo Harun gi yawuote kod jodong Israel.

² Nowacho ni Harun niya, “Kaw nyarwath mondo otimgo misango mar golo richo, kod im otimgo misango miwang’o pep, mondo ikelgi e nyim Ruoth Nyasaye. Jamnigo nyaka bed maonge songa.

³ Bang’e chik jo-Israel mondo okaw nywok otimgo misango mar golo richo, kendo gikaw nyaroya gi nyarombo ma hikgi achiel achiel, maonge songa, mondo otimgo misango miwang’o pep,

⁴ kendo gikaw rwath gi im mondo otimgo misengni mag sawo e nyim Ruoth Nyasaye, kaachiel gi misango mar cham moruw gi mo, nimar Ruoth Nyasaye biro fwenyorenu tinende.”

⁵ Ne gikelo gik mane Musa ochikogigo duto e nyim Hemb Romo, kendo oganda duto nosudo, mochung’ e nyim Ruoth Nyasaye.

⁶ Eka Musa nowacho niya, “Ma e gima Ruoth Nyasaye osechikou mondo utim mondo duong’ne maler ofwenyrenu.”

⁷ Nowacho ni Harun ni, “Sud but kendo-mar-misango, mondo itim misango mar golo richo, kod misango miwang’o pep, mondo ipwodhrigo, kendo ipwodhgo joodi. Bang’e itim misango gi jamni ma oganda ochiwo, kipwodhogo oganda, kaka Ruoth Nyasaye ochiko.”

⁸ Omiyo Harun nosudo but kendo-mar-misango, mi onyang’o nyarwath mibi timgo misango mar golo richone owuon.

⁹ Yawuote nokelone remo, mi olutoe lith lwete, kendo omienogo tunge mag kendo-mar-misango. To remo modong’ nopuko e tiend kendo.

¹⁰ Nokawo boche gi nyiroke kod jwala mabor man ewi chuny mag chiayo mane otimgo misango mar goolo richo, mowang’o e kendo-mar-misango kaka Ruoth Nyasaye nochiko Musa.

¹¹ To ring’o gi pien notero oko mar kambi, mowang’o pep.

¹² Bang’ mano Harun noyang’o chiayo mane ibi timgo misango miwang’o pep, kendo yawuote nogamone remo, mokiro e bethe duto mag kendo-mar-misango.

¹³ Eka ne gigamone lemo mag chiayono, kaachiel gi wich, mi ne owang’ogi e kendo-mar-misango.

¹⁴ Nolwoko jambich kod tielo, mi nowang’ogi e kendo-mar-misango, kaachiel gi misango miwang’o pep.

¹⁵ Eka nokelo gik mane ji ochiwo, mokawo nywok mane ibi timgo misango mar golo richo ni oganda. Noyang’e kendo nopwodhogo richogi kaka ne opwodho richone owuon.

¹⁶ Bang’ mano nokelo chiayo mane ibi timgo misango miwang’o pep, mi notiyo kode kaka chik dwaro.

¹⁷ Eka nokelo mogo mane ibi timgo misango mar cham, kendo nojuko sanja mowang’o e kendo-mar-misango kaachiel gi misango mar okinyi miwang’o pep.

¹⁸ Bang’e noyang’o rwath kod im mane ibi timgo misango mar sawo ni oganda, mi yawuote nogamone remo mokiro e bethe duto mag kendo-mar-misango.

¹⁹ Ne gikawo boche mag rwath, gi sembe mar im gi boche mogawo jambich kod nyiroke gi boche mogawo nyiroke, kaachiel gi jwala mabor man ewi chuny,

²⁰ mi giketogi ewi agoko mag jamnigo, eka ne giwang’ogi e kendo-mar-misango.

²¹ Harun nokawo agoko gi em ma korachwich, mi ochiwo e nyim Ruoth Nyasaye ka mich moyiedhi, kaka Musa nochiko.

²² Bang’e Harun noting’o lwete malo kochomo oganda, moguedhogi. Eka nolor oa kama notimoe misengni mag golo richo, gi misengni miwang’o pep, kod mag sawo.

²³ Musa gi Harun nodonjo e Hemb Romo, to kane giwuok oko ne giguedho ji, mi duong’ maler mar Ruoth Nyasaye nofwenyore ni ji duto.

²⁴ Mach nomwuoch e nyim Ruoth Nyasaye, mowang’o misango miwang’o pep, kaachiel gi boche mane nie kendo-mar-misango. Kane ji duto oneno kamano, ne gikok, mi gipodho piny auma.