Tim jo-Lawi 8 - MUMA MALER 2015

Oket Harun kod yawuote e tich dolo

¹ Ruoth Nyasaye nowacho ni Musa niya,

² “Kaw Harun gi yawuote kendo kaw lep dolo gi mor wir gi rwath mitimogo misango mar golo richo gi imbe ariyo kod odheru moting’o makati ma ok ketie thowi,

³ bende ichok oganda jo-Israel duto e dho Hemb Romo.”

⁴ Musa notimo kaka Ruoth Nyasaye nochike, mi jo-Israel nochokore e dho Hemb Romo.

⁵ Eka nonyiso ji niya, “Gima adwaro timoni, ema Ruoth Nyasaye nochiko.”

⁶ Nokelo Harun gi yawuote, mi olwoko gi pi.

⁷ Bang’ mano norwako ni Harun kandhu, mi otweyone okanda e nungone kendo norwakone aroya, gi law efod, kotueyo gi okanda mar efod.

⁸ Notueyone law agoko, moketo ombulu miluongo ni Urim gi Thumim e iye.

⁹ Eka nosidhone kilemba, kendo oketone dhahabu mopamore, ma en osimbo maler, e nyim kilemba, kaka ne Ruoth Nyasaye ochike.

¹⁰ Bang’e Musa nokawo mor wir, mowirogo Hema Maler kod gik moko duto mane ni e iye, kopwodhogi ni tich Nyasaye.

¹¹ Bende nokiro mo moko dibiriyo e kendo-mar-misango, mowire kaachiel gi gige duto, kod karaya mar lwok gi rachungine, kopwodhogi ni tich Nyasaye.

¹² Noolo mo moko ewi Harun, mi owire, kokete e tich dolo.

¹³ Eka nokelo yawuot Harun, morwakonigi kendhe, kendo otueyonigi okanda, mi osidhonigi kilemba, kaka Ruoth Nyasaye nochike.

¹⁴ Bang’ mano Musa nokelo rwath mane idhi timgo misango mar golo richo, mi Harun gi yawuote noketo lwetgi e wiye, eka Musa nonege.

¹⁵ Nokawo remb rwadhno mi omieno e tunge kendo-mar-misango gi lith lwete, mondo opwodhego. Eka nopuko remo modong’ e tiend kendo-mar-misango, mi owalo ni Ruoth Nyasaye, kotimoe misango mipwodhogo richo.

¹⁶ Bang’e nokawo boche mag jambich gi jwala mabor man ewi chuny, kod nyiroke gi boche mogawo nyiroke, mi nowang’ogi e kendo-mar-misango.

¹⁷ To rwadhno duto, ma tiende gi piene gi ringe kod owuoche nogolo oko mar kambi, mowang’o pep, kaka Ruoth Nyasaye nochike.

¹⁸ Eka Musa nokelo im mane ibi timgo misango miwang’o pep. Harun gi yawuote noketo lwetgi ewi imno, eka Musa nonege.

¹⁹ Nokawo remo mokiro e bethe duto mag kendo-mar-misango.

²⁰ Ne opogo imno lemo lemo, mowang’o wiye gi lembe duto kod bochene.

²¹ Eka nolwoko jambich kod tielo e pi, mowang’ogi e kendo-mar-misango. Mano ne misango miwang’o pep mondo odum mamit ni Ruoth Nyasaye, kaka Ruoth Nyasaye nochiko Musa.

²² Bang’ mano Musa nokelo im machielo mar keto jadolo e tich. Harun gi yawuote noketo lwetgi e wiye, eka Musa nonege.

²³ Nokawo remo momieno e it Harun ma korachwich, kendo e lith lwete mathwon ma korachwich, kendo e lith tiende mathwon ma korachwich.

²⁴ Eka nokelo yawuot Harun, momieno remo e itgi ma korachwich gi lith lwetgi mathwon ma korachwich, kod lith tiendgi mathwon ma korachwich. Bang’e nokiro remo modong’ e bethe duto mag kendo-mar-misango.

²⁵ Eka nokawo boche duto, kaka sembe gi boche mogawo jambich gi jwala mabor man ewi chuny, kod nyiroke gi boche mogawo nyiroke, kaachiel gi em ma korachwich.

²⁶ Eka nodhi e odheru moting’o makati ma ok ketie thowi mane ni e nyim Ruoth Nyasaye, mokawoe makati achiel ma ok ketie thowi gi kek achiel moted gi mo, kod chapat achiel, moketogi e wi boche gi em ma korachwich.

²⁷ Gigo duto noketo e lwet Harun gi yawuote mondo ochiw ka mich moyiedhi.

²⁸ Bang’e nochako okawogi e lwetgi, mowang’ogi kaachiel gi misango miwang’o pep e kendo-mar-misango. Mano ne misango mar keto jodolo e tich, miwang’o gi mach mondo odum mamit ni Ruoth Nyasaye.

²⁹ Musa nokawo agoko mochiwo ka mich moyiedhi. Mano ne e lembe kuom im mar keto jodolo e tich, kaka Ruoth Nyasaye nochike.

³⁰ Nokawo mor wir moko gi remo moko mane ni ewi kendo mar misango, mokiro kuom Harun gi lepe mag dolo, kendo kuom yawuote gi lepgi mag dolo.

³¹ Musa nowachoni Harun gi yawuote niya, “Teduru ring imno e dho Hemb Romo, kendo uchame kuno kaachiel gi makati manie odheru moting’o gik miketogo jodolo e tich, mana kaka Ruoth Nyasaye nochika niya, ‘Harun gi yawuote nyaka cham ring’ono.’

³² To ring’o kod makati modong’, nyaka uwang’ pep gi mach.

³³ Kuom ndalo abiriyo kik ua e dho Hemb Romo, nyaka ndalo mar ketou e tich dolo rum, nimar nyasi mar ketou e tich dolo kawo ndalo abiriyo.

³⁴ Kaka wasepwodhou kawuononi e kaka Ruoth Nyasaye nochiko ni mondo otim.

³⁵ Omiyo koro beduru e dho Hemb Romo odiechieng’ gotieno kuom ndalo abiriyo, kutimo gima Ruoth Nyasaye ochiko, mondo kik utho. Mano e kaka Ruoth Nyasaye nochika.”

³⁶ Kamano Harun gi yawuote notimo gik moko duto mane Ruoth Nyasaye omiyo Musa ochikogi.